وڭىرلەردە سۋ تاسقىنىنا قارسى ءىس-شارالار بەلسەندى جالعاسىپ جاتىر. بۇل تۋرالى توتەنشە جاعدايلار مينيسترلىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
تمج 1,7 ملن استام تەكشە مەتر ەرىگەن سۋدىڭ سورىلىپ، 82 مىڭنان استام قاپ پەن 20 183 توننا ينەرتتى ماتەريال توسەلگەنىن اتاپ ءوتتى.
«اۆاريالىق-قۇتقارۋ جۇمىستارىنا جەكە قۇرامىنان 6 200-دەن استام ادام، 1600-گە جۋىق بىرلىك تەحنيكا، 630-عا جۋىق سۋ ايداۋ جانە ءجۇزۋ قۇرالى، تجم، قم، ۇقك 6 اۋە كەمەسى جۇمىلدىرىلدى.
جۇمىلدىرىلعان كۇشتەر مەن قۇرالدار اقتوبە، اقمولا، قوستاناي، باتىس قازاقستان وبلىستارىنداعى 313 جەكە تۇرعىن ۇيدەن، سونداي-اق اقتوبە، اقمولا، قوستاناي، باتىس-قازاقستان وبلىستارىنداعى 369 اۋلا اۋماعىنان، اقتوبە وبلىسىنىڭ 10 ساياجاي ۇيلەرىنەن سۋ سورۋ جۇمىستارى جۇرگىزۋدە»،—دەلىنگەن حابارلامادا.
مينيسترلىكتىڭ مالىمدەۋىنشە، تۇركىستان، اقتوبە، قوستاناي، باتىس قازاقستان وبلىستارىنىڭ سۋ باسقان ەلدى مەكەندەرىنەن 2 054 ادام ەۆاكۋاتسيالانعان، ولاردىڭ 613-ءى بالا.
ايتا كەتەيىك، رەسپۋبليكالىق جانە وبلىستىق جەدەل شتابتار، سونداي-اق «جەدەل جەلى» تەلەفوندارى جۇمىسىن جالعاستىرۋدا: تجم 8 717 2 70 41 14, اقتوبە وبلىسى تجد 8 713 2 54 86 57, باتىس قازاقستان وبلىسى تجد 8 711 2 55 40 88, قوستاناي وبلىسى تجد 8 714 2 50 19 60, اقمولا وبلىسى تجد 8 716 2 52 55 14.
