ادەيى ءورت قويۋى مۇمكىن – قورعانىس ءمينيسترى ارىستاعى جارىلىستار تۋرالى

2637
Adyrna.kz Telegram

نۇرلان ەرمەكباەۆتىڭ ايتۋىنشا، وقيعاعا قاتىستى تەرگەۋ امالدارى ءبىر اي ىشىندە اياقتالادى

 قورعانىس ءمينيسترى نۇرلان ەرمەكباەۆ ارىس قالاسىنداعى جارىلىستىڭ سەبەپتەرىن اتادى، دەپ حابارلايدى Sputnik قازاقستان ءتىلشىسى.

"سالعىرتتىق بولۋى مۇمكىن. تەز جاناتىن زاتتاردىڭ تۇتانۋى، ەلەكتر سىمداردىڭ تۇيىقتالۋى، ءتىپتى ادەيى ءورت قويۋى دا مۇمكىن. بۇگىندە ءبىز بىردە-ءبىر سەبەپتى جوققا شىعارمايمىز. سوندىقتان ارنايى تەرگەۋ توبىنىڭ جۇمىسى ءوز ناتيجەسىن بەرەدى دەگەن سەنىم بار", - دەدى ەرمەكباەۆ جۋرناليستەرگە بەرگەن سۇحباتىندا.

ءمينيستردىڭ ايتۋىنشا، تەرگەۋ امالدارى ءبىر ايدىڭ ىشىندە اياقتالۋى قاجەت. سونىڭ ناتيجەسىندە كىنالى ادامدار قاتاڭ جازاعا تارتىلادى.

"وسى وقيعا ءۇشىن كىنالى ادامدار قاتاڭ جازالانادى. ولاردى ەشكىم جاسىرمايدى. بىراق تاعى ءبىر مارتە ايتا كەتەيىن، اسكەري ازاماتتار ءوز مىندەتتەرىن اتقاردى", - دەيدى ەرمەكباەۆ.

ونىڭ سوزىنە قاراعاندا، ەكى اپتانىڭ ىشىندە ارىستاعى اسكەري ارسەنالدى باسقا جەرگە كوشىرۋ جۇمىستارى باستالادى. ال وسى وقيعادان كەيىن بارلىق اسكەري بولىمدە تاعى ءبىر تەكسەرۋ جۇرگىزىلەدى.

"نەگىزى، ونداي تەكسەرىستەر تۇراقتى تۇردە جۇرگىزىلەدى. ارىستا دا بىرنەشە تەكسەرىس بولدى. سول كەزدە ءبىرشاما كەمشىلىك انىقتالعان. بىراق باسىم بولىگى جويىلدى. سوعان قاراماستان، مەن بارلىق گارنيزون بويىنشا تاعى ءبىر تەكسەرىستى وتكىزۋدى ۇيعاردىم. نەگىزگى ماقسات – ەلدى مەكەندەرگە جاقىن جەرلەردە ارتيللەريالىق سناريادتاردى قالدىرماۋ. ونداي جەرلەردە تەك كۇزەتكە ارنالعان وق-دارىلەر عانا قالادى", - دەدى ەرمەكباەۆ.

ارىستاعى جارىلىس

24 ماۋسىم كۇنى تاڭەرتەڭ تۇركىستان وبلىسى ارىس قالاسىندا جارىلىس بولدى. قالا ماڭىنداعى اسكەري ءبولىمنىڭ قويماسىندا ءورت شىعىپ، وق-ءدارى جارىلا باستاعان. جارىلىس سالدارىنان ءۇش ادام قازا تاپقان: ءبىر تۇرعىن جانە ەكى اسكەري قىزمەتكەر.

 

پىكىرلەر