قوستانايدا ءوڭىردىڭ تاماق ونەركاسىبىندەگى ءىرى ينۆەستيتسيالىق جوبالاردىڭ ءبىرى – «بايان سۇلۋ» اق-نىڭ «كونديتەرلىك استانا» جاڭا تەحنولوگيالىق كەشەنى ىسكە قوسىلدى. جوسپارلانعان كەڭەيتۋ جۇمىستارى مەن قوسىمشا وندىرىستىك جەلىلەردى ورناتۋدى ەسكەرگەندە، جوباعا سالىناتىن ينۆەستيتسيا كولەمى 14,6 ملرد تەڭگەدەن 20 ملرد تەڭگەگە دەيىن ارتادى. بۇل وندىرىستىك مۇمكىندىكتەردى كەڭەيتىپ، وبلىستىڭ تاماق ونەركاسىبىنىڭ دامۋىنا جاڭا سەرپىن بەرەدى.
«كونديتەرلىك استانا» جوباسىن جۇزەگە اسىرۋ مەملەكەت باسشىسىنىڭ اۋىل شارۋاشىلىعى ونىمدەرىن وڭدەۋ ۇلەسىن ارتتىرۋ جونىندەگى تاپسىرمالارىن ورىنداۋداعى ماڭىزدى قادام. وبلىس ءۇشىن جەرگىلىكتى شيكىزاتتى بارىنشا پايدالانۋ، تەرەڭ وڭدەۋدى دامىتۋ، جاڭا جۇمىس ورىندارىن اشۋ جانە ەكونوميكالىق تيىمدىلىگى جوعارى ءونىم ءوندىرۋ اسا ماڭىزدى. مۇنداي جوبالار ءوڭىر ەكونوميكاسىن نىعايتىپ قانا قويماي، ونىڭ ونەركاسىپتىك جانە ەكسپورتتىق الەۋەتىن ارتتىرۋعا مۇمكىندىك بەرەدى.
بۇدان بولەك، بيىل قوستاناي قالاسىندا جىلىنا 40 مىڭ توننادان استام ماكارون ونىمدەرىن شىعاراتىن زاۋىت پايدالانۋعا بەرىلەدى. ليساكوۆسك قالاسىندا قۋاتى جىلىنا 350 مىڭ توننا بولاتىن ماي ەكستراكتسيالاۋ زاۋىتىنىڭ قۇرىلىسى جۇرگىزىلۋدە. الداعى ۋاقىتتا رۋدنىي قالاسىندا جىلىنا 415 مىڭ توننا استىقتى تەرەڭ وڭدەيتىن زاۋىت سالۋ جوسپارلانعان. مۇندا وندىرىلەتىن بيوەتانول تۇراقتى اۆياتسيالىق وتىن (SAF) وندىرۋگە ارنالعان شيكىزات رەتىندە پايدالانىلماق. سونداي-اق بەيىمبەت مايلين اۋدانىندا قۋاتى جىلىنا 300 مىڭ توننا بولاتىن مايلى داقىلداردى ساقتاۋ جانە وڭدەۋ كەشەنىنىڭ قۇرىلىسى ءجۇرىپ جاتىر.
وسى جوبالاردى جۇزەگە اسىرۋ ناتيجەسىندە استىقتى وڭدەۋ قۋاتى بولاشاقتا شامامەن 1 ملن تونناعا ارتىپ، جىلىنا ورتا ەسەپپەن 3 ملن تونناعا جەتەدى.
مايلى داقىلداردى وڭدەۋ كولەمى دە ايتارلىقتاي ۇلعايادى. جاڭا جوبالاردى ەسكەرگەندە، وڭىردەگى مايلى داقىلداردى وڭدەۋدىڭ جيىنتىق قۋاتى جىلىنا 650 مىڭ تونناعا دەيىن جەتەدى.
جالپى، اتالعان جوبالاردى ىسكە اسىرۋ ناتيجەسىندە وبلىستىڭ وڭدەۋشى كاسىپورىندارىنىڭ وندىرىستىك قۋاتى 50 پايىزعا ارتادى.
«بايان سۇلۋ» اق-نىڭ جاڭا كەشەنى كاسىپورىننىڭ جىلدىق وندىرىستىك قۋاتىن 16,6 مىڭ توننا كونديتەرلىك ونىمگە ارتتىرادى. جوبا تولىق قۋاتىنا شىققاننان كەيىن كاسىپورىن جىل سايىن 68 مىڭ تونناعا دەيىن ءونىم وندىرەتىن بولادى.
وسىنىڭ ناتيجەسىندە قوستاناي وبلىسى كونديتەرلىك ءونىم ءوندىرۋ كولەمى بويىنشا ەلىمىزدەگى كوشباسشى وڭىرلەردىڭ بىرىنە اينالادى.
كونديتەرلىك ونىمدەر – جاي عانا ازىق-تۇلىك ەمەس. ولار ءاردايىم ادام ومىرىندەگى قۋانىشتى ساتتەرمەن بايلانىستى. داستارقانعا ءتاتتى تاعام قويىلعاندا، ونىمەن بىرگە ەرەكشە كوڭىل-كۇي دە كەلەدى. بالالاردىڭ كۇلكىسى، ۇلكەندەردىڭ قۋانىشى، مەرەكەلىك كوڭىل-كۇي مەن وتباسىلىق جىلىلىق قاتار سەزىلەدى.
– جاڭا «كونديتەرلىك استانا» كەشەنى ساپالى ءارى سۇرانىسقا يە ءونىم وندىرەتىن كاسىپورىن عانا ەمەس، قازاقستانداعى جانە ودان تىس جەرلەردەگى ميلليونداعان ادامعا قۋانىش سىيلايتىن ءوندىرىس وشاعىنا اينالسىن، – دەپ اتاپ ءوتتى قوستاناي وبلىسىنىڭ اكىمى قۇمار اقساقالوۆ.
جاڭا وندىرىستە بيسكۆيت ونىمدەرى مەن پەچەنە شىعارۋعا باسىمدىق بەرىلگەن. بۇل رەتتە كاسىپورىن وتاندىق اۋىل شارۋاشىلىعى شيكىزاتىن وڭدەۋ كولەمىن ارتتىرادى. مۇنىڭ پايداسى تەك ءوندىرىس سالاسىمەن شەكتەلمەي، ءوڭىردىڭ اگروونەركاسىپتىك كەشەنىنە دە تيەدى.
وتاندىق نارىق ءۇشىن بۇل باعىتتىڭ ماڭىزى زور. ويتكەنى كونديتەرلىك ونىمدەر نارىعىنىڭ ەداۋىر بولىگىن ءالى دە يمپورتتىق ونىمدەر قۇرايدى. وندىرىستىك قۋاتتىڭ ارتۋى «بايان سۇلۋعا» وتاندىق ءونىم كولەمىن ۇلعايتىپ، اسسورتيمەنتتى كەڭەيتۋگە جانە قازاقستاندىق وندىرۋشىلەردىڭ نارىقتاعى ورنىن نىعايتۋعا مۇمكىندىك بەرەدى.
جوبا اياسىندا 260 جاڭا جۇمىس ورنىاشىلادى. الايدا ونىڭ وبلىس ەكونوميكاسىنا بەرەر اسەرى مۇنىمەن شەكتەلمەيدى. شيكىزاتتى وڭدەۋ كولەمىنىڭ ارتۋى، جاڭا ىسكەرلىك بايلانىستاردىڭ قالىپتاسۋى، ەكسپورتتى ۇلعايتۋ جانە ءوندىرىس سالاسىن ودان ءارى دامىتۋ ءۇشىن قوسىمشا مۇمكىندىكتەر پايدا بولادى.
جاڭا وندىرىستىك قۋاتتار ەكسپورت كولەمىن ارتتىرۋعا دا جول اشادى. وسىلايشا، ءبىر ينۆەستيتسيالىق جوبا بىرنەشە ماڭىزدى مىندەتتى قاتار شەشۋگە مۇمكىندىك بەرەدى. ولار – ءوندىرىس كولەمىن ۇلعايتۋ، وتاندىق شيكىزاتتى تەرەڭ وڭدەۋ، حالىقتى جۇمىسپەن قامتۋ جانە قازاقستاندىق ءونىمنىڭ باسەكەگە قابىلەتتىلىگىن ارتتىرۋ.
كاسىپورىن ءۇشىن جاڭا كەشەن – دامۋدىڭ كەزەكتى كەزەڭى. «بايان سۇلۋ» اق باسقارما توراعاسى – پرەزيدەنتى تيمۋر سادىقوۆ اتاپ وتكەندەي، وندىرىستىك قۋاتتى كەڭەيتۋ – تەك كاسىپورىنعا سالىنعان ينۆەستيتسيا عانا ەمەس، سونىمەن قاتار كومپانيا برەندىن ساپا مەن ءداستۇردىڭ سيمۆولى رەتىندە ودان ءارى نىعايتۋعا باعىتتالعان قادام.
– ءبىز تۇتىنۋشىلارىمىزدىڭ سۇيىكتى تاتتىلەرىن بۇرىنعىدان دا كوپ كولەمدە ۇسىنۋعا ۇمتىلامىز, – دەدى تيمۋر سادىقوۆ.
«كونديتەرلىك استانانىڭ» ىسكە قوسىلۋى – ءبىر كاسىپورىننىڭ ءوندىرىس كولەمىن ۇلعايتۋمەن شەكتەلمەيتىن، ءوڭىر ەكونوميكاسىن ارتاراپتاندىرۋعا باعىتتالعان ماڭىزدى قادام. قوستاناي وبلىسى ءۇشىن بۇل – جاڭا وندىرىستىك قۋاتتار، جۇمىس ورىندارى جانە وتاندىق شيكىزاتتى تەرەڭ وڭدەۋ مۇمكىندىگى. مۇنىڭ بارلىعى ءوڭىر ەكونوميكاسىنىڭ تۇراقتى دامۋىنا تىكەلەي ىقپال ەتەتىن ناقتى ناتيجەلەر.
بۇل باعىتتاعى جۇمىستىڭ ناتيجەسى قازىردىڭ وزىندە بايقالادى. بۇگىندە قوستاناي وبلىسى وڭدەلگەن اۋىل شارۋاشىلىعى ونىمدەرىن ەكسپورتتاۋ كولەمى بويىنشا ەلىمىزدە ءبىرىنشى ورىندا تۇر.
