مەملەكەت باسشىسى قاسىم-جومارت توقاەۆ التاي كولگىنوۆتى قازاقستاننىڭ ەستونياداعى ەلشىسى قىزمەتىنە تاعايىندادى، دەپ حابارلايدى "ادىرنا" ۇلتتىق پورتالى اقوردانىڭ ءباسپاسوز قىزمەتىنە سىلتەپ.
«مەملەكەت باسشىسىنىڭ جارلىعىمەن التاي سەيدىرۇلى كولگىنوۆ قازاقستان رەسپۋبليكاسىنىڭ ەستونيا رەسپۋبليكاسىنداعى توتەنشە جانە وكىلەتتى ەلشىسى قىزمەتىنە تاعايىندالدى»، - دەلىنگەن حابارلامادا.
نۇرلان سەيتىموۆ بۇل قىزمەتتەن بوساتىلدى.
كولگىنوۆ 2023 جىلدىڭ ماۋسىمىنا دەيىن پرەمەر-ءمينيستردىڭ ورىنباسارى قىزمەتىندە بولدى. وعان دەيىن ول استانا، باتىس قازاقستان وبلىسىنىڭ جانە ورال قالاسىنىڭ اكىمى بولعان.
كولگىنوۆ ەلدە كوروناۆيرۋس جايلاعان كەزدە "نۇرسۇلتان" اتالعان استانانىڭ اكىمى بولاتىن. ەل استاناسى سول كەزدە پاندەميادان ەڭ قاتتى زارداپ شەككەن قالانىڭ ءبىرى بولدى. سول ءۇشىن دە 2020 جىلى پرەزيدەنت توقاەۆ التاي كولگىنوۆكە ەسكەرتۋ دە جاساعان.
مۇنىڭ سىرتىندا، التاي كولگىنوۆ قالادا، جالپى ەلدە كوروناۆيرۋستان كوز جۇمعاندار سانى ارتىپ، ەلدە ءدارى-دارمەك جەتىسپەي، اۋرۋحانالار لىقا تولعان كەزدە 2020 جىلى 6 شىلدە، "استانا كۇنى" (نازارباەۆتىڭ دا تۋعان كۇنى) قالادا ۇلكەن وتشاشۋ ۇيىمداستىرعانىمەن دە اتىشۋلى بولعان. ول استانا اكىمى قىزمەتىنەن سۋ داۋىنا قاتىستى بوساعان.
