ماسكەۋدەگى كروكۋس سيتي حوللداعى تەراكت كەزىندە ەكى قىرعىزستاندىق ايەل جوعالىپ كەتتى. بۇل تۋرالى الەۋمەتتىك جەلىلەردە جاريالاندى، دەپ حابارلايدى “ادىرنا” ۇلتتىق پورتالى 24.kg سايتىنا سىلتەپ.
24 جاستاعى ەديتا ءجۇسىپوۆا مەن 20 جاستاعى مايزا گۇلجىگىتقىزى Crocus City Hall كونتسەرتتىك ورتالىعىنداعى ءدامحانالاردىڭ بىرىندە جۇمىس ىستەگەنى ايتىلادى.
قىرعىزستاننىڭ سىرتقى ىستەر مينيسترلىگى بۇل اقپاراتتى راستادى. ولار قىزداردى ىزدەۋدە.
ەستەرىڭىزگە سالا كەتەيىك، 22 ناۋرىزدا ماسكەۋ تۇبىندەگى Crocus City Hall عيماراتىندا تەراكت بولدى. مۋزىكالىق توپتىڭ كونتسەرتىنە مىڭداعان ادام كەلدى. الدىن الا مالىمەتتەر بويىنشا، عيماراتقا بەتپەردەسىز كامۋفلياج كيگەن بەلگىسىز ءۇش ەر ادام كىرىپ، ادامداردى وق اتۋعا كىرىسكەن.
ماسكەۋ وبلىسىنىڭ دەنساۋلىق ساقتاۋ مينيسترلىگى لاڭكەستىك ارەكەتتەن ءۇش بالانىڭ قازا تاپقانىن حابارلادى. جالپى، رەسەيدىڭ تەرگەۋ كوميتەتىنىڭ مالىمەتىنشە، Crocus City Hall-دا بولعان تەراكتىدە قازا تاپقاندار سانى 115 ادامعا دەيىن ءوستى. ىزدەۋ جۇمىستارى جالعاسۋدا.
