ەكىباستۇزدا سۋ قويماداعى مۇز استىنا كەتكەن كولىكتەن ەكى ادامنىڭ ءمايىتى شىعارىلدى، دەپ حابارلايدى “ادىرنا” ۇلتتىق پورتالى توتەنشە جاعدايلار مينيسترلىگىنىڭ ءباسپاسوز قىزمەتىنە سىلتەپ.
«22 ناۋرىزدا ساعات 20.33-تە ەكىباستۇز قالاسى، 2-گرەس اۋدانىنداعى «شاندىقسور» جاساندى سۋ قويماسىنا 1978 جانە 1976 جىلى تۋعان ەر ادامدار جەكە كولىكتەرىن ايداپ كەتكەنى تۋرالى حابارلاما ءتۇستى. ەر ادامدار بالىق اۋلاۋعا پاۆلوداردان بارعانى بەلگىلى بولدى. كولىك جاعادان 700-800 م جەرگە باتىپ كەتكەن. 23 ناۋرىزدا ساعات 7.20-دا ەكىباستۇز قالاسىنىڭ قۇتقارۋشىلارى ىزدەستىرۋ-قۇتقارۋ جۇمىستارىن باستادى. جەتى ادام، ەكى تەحنيكا جانە ءبىر سۋ كولىگى جۇمىلدىرىلدى. قازا بولعان بالىقشىلاردىڭ مايىتتەرىن قۇتقارۋشىلار سۋ قويماسىنان شىعاردى»، - دەلىنگەن سەنبى كۇنى تاراتقان حابارلامادا.
توتەنشە جاعدايلار مينيسترلىگى مۇزدىڭ قازىر وتە جۇقا ەكەنىن، ونىڭ ۇستىنە شىعۋ ادام ومىرىنە قاۋىپ توندىرەتىنىن ەسكەرتتى.
