فۋتبولدان امەريكا كۋبوگىنىڭ فينالىنا شىققان ءبىر كوماندا بەلگىلى بولدى. جارتىلاي فينالدا (1/2) ارگەنتينا قۇراماسىن ۇتقان برازيليا فينالعا جولداما الدى.
بەلۋ-وريزونتي (برازيليا) قالاسىنداعى "مينەيران" ستاديونىندا وتكەن ويىندا جارىس قوجايىندارى 2:0 ەسەبىمەن جەڭىسكە جەتتى. 19 مينۋتتا گابريەل جەزۋس ەسەپ اشتى. 71 مينۋتتا روبەرتو فيرمينو ناتيجەنى ەسەلەدى.
ارگەنتينا قۇراماسى ەرەكشە ويىنىمەن جانكۇيەرلەرىن قۋانتا المادى. كوماندا كوشباسشىسى ليونەل مەسسي الاڭدا 90 مينۋت ويناپ، كومانداسىمەن جەڭىسكە باستار جولدى تاپپادى.
برازيليا قۇراماسىنىڭ فينالداعى قارسىلاسى 4 شىلدە كۇنى انىقتالادى. چيلي جانە پەرۋ قۇرامالارى اراسىنداعى ويىننىڭ جەڭىمپازىمەن كەزدەسەدى.
"امەريكا كۋبوگىنىڭ" فينالى 7 شىلدە كۇنى وتەدى. ءۇشىنشى ورىن ءۇشىن وتەتىن ويىن دا وسى كۇنگە جوسپارلانعان. تەك ەرتەرەك باستالىپ، فينالعا دەيىن اياقتالىپ ۇلگەرەدى.
دەرەككوز: BAQ.KZ
