ناۋرىز مەيرامىندا ورال قالاسىنىڭ زاشاعان كەنتىندە 9 قاباتتى جاڭا تۇرعىن ءۇي قولدانىسقا بەرىلدى. ايتۋلى شارا ناۋرىزنامانىڭ ىنتىماق كۇنىمەن قاتار كەلدى.
پاتەر كىلتتەرىن تاپسىرۋ ءراسىمىنە باتىس قازاقستان وبلىسىنىڭ اكىمى ناريمان تورەعاليەۆ قاتىستى. ءوڭىر باسشىسى جينالعانداردىڭ بارلىعىن ناۋرىز مەيرامىمەن قۇتتىقتاپ، جاڭا قونىس يەلەرىنە باقىت تىلەدى.
«مەملەكەت باسشىسى قاسىم-جومارت توقاەۆ ءوز جولداۋلارىندا حالىقتىڭ ءال-اۋقاتى مەن ءومىر ءسۇرۋ ساپاسىن ارتتىرۋ – مەملەكەتتىڭ باستى مىندەتى ەكەنىن اتاپ ءوتتى. وسى ورايدا، ءار وتباسىن تۇرعىن ۇيمەن قامتاماسىز ەتۋگە باعىتتالعان باستامالار ماڭىزعا يە. بۇگىندە ورال قالاسىندا مەملەكەتتىك باعدارلامالار ارقىلى 14 كوپپاتەرلى ءۇيدىڭ قۇرىلىسى جۇرگىزىلۋدە. ال مەملەكەتتىك باعدارلاما اياسىندا سالىنعان كوپقاباتتى تۇرعىن ۇيلەر «وتباسى بانك» اق ارقىلى كەزەكتە تۇرعاندارعا جەڭىلدەتىلگەن پايىزدىق نەسيەمەن بەرىلەدى. بۇگىن، مىنە وسى باعدارلاما ارقىلى كەزەكتە تۇرعان 80 وتباسى باسپانالى بولدى. بۇگىنگى جاڭا پاتەر يەلەرىن باسپانالى بولۋلارىمەن قۇتتىقتايمىن. سونداي-اق، ناۋرىز مەيرامى بارشاڭىزعا قۇت-بەرەكە اكەلسىن!» – دەدى ايماق باسشىسى.
پرەزيدەنتىنىڭ تاپسىرماسى بويىنشا ەلىمىزدە «قۋاتتى وڭىرلەر – ەل دامۋىنىڭ درايۆەرى» جوباسى جۇزەگە اسۋدا. جاڭا تۇرعىن ءۇي قۇرىلىسى اتالمىش جوبا اياسىندا جۇزەگە اسىرىلدى.
باسپانالى بولعانداردىڭ كوپشىلىگى مۇمكىندىگى شەكتەۋلى، سونداي-اق پاتەر كەزەگىندە تۇرعان جاندار.
«كوپ جىل كەزەكتە تۇردىق. ەندى مىنە ارمانىمىز ورىندالدى. مەملەكەتكە ريزامىز. ەندى مىنە، ناۋرىز مەيرامىن جاڭا پاتەردە قارسى الامىز، قۋانىشىمىزدا شەك جوق» – دەدى جاڭا پاتەر يەسى نۇرگۇل ەسەناليەۆا.
ايتا كەتۋ كەرەك، ورال قالاسىندا 2024 جىلى 1400-دەن استام پاتەردى قولدانىسقا بەرۋ جوسپارلانىپ وتىر.
باتىس قازاقستان وبلىسى اكىمىنىڭ ءباسپاسوز قىزمەتى
