حالىقارالىق «الاش» سىيلىعىنىڭ لاۋرەاتى، «قۇرمەت» جانە «پاراسات» وردەندەرىنىڭ يەگەرى سوفى سماتاەۆ ەكى مينيسترلىكتە قىزمەت ىستەپ جۇرگەن ۇلى مەن قىزىن كارىم ءماسىموۆ ءبىر-اق كۇندە جۇمىستان شىعارىپ جىبەرگەنى تۋرالى ايتتى. ول بۇل تۋرالى فەيسبۋكتەگى پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.
جازۋشى كەيىنگى ۋاقىتتا دەنساۋلىعىنىڭ ناشارلاعانى جايلى ءجيى جازىپ ءجۇر. ونىڭ ايتۋىنشا، ءۇش اي سايىن ەم الىپ جۇرگەن اۋرۋحاناسى ءوزىن تىركەۋدەن شىعارىپ تاستاعان.
«اسقازانى جوق اعزامنىڭ قابىلداعان تاعامدى جارتىلاي عانا قورىتىپ، قاجەتتى ۆيتاميندەردى جەتكىزە الماي، قانىمدى سۇيىلتىپ، اعارتا باستاعاندا، اۋرۋحاناعا ءۇش ايدا ءبىر جاتىپ، قىزىل تۇيىرشىكتەردى ءبىراز جيناپ قايتۋشى ەدىم. تىركەۋدەن شىعارىپ تاستاعاننان بەرى سول قان اعارۋىنان سەسكەنگەن ۇرەيىمدى كوبىرەك جازىپ كەتىپ، ءۇمىتىمدى ۇزگىزبەي، جىگەرىمدى جاسىتپاي قاداعالاپ وتىراتىن شاكەم ول جاققا كەتكەلى ۇرگەدەك ۋايىمعا سالىنىپ، سىزدەردى دە شوشىتىپ العانىمدى سەزىنىپ وتىرمىن. تامىزدىڭ ونىنان اۋرۋحاناعا جاتىپ-شىعىپ، قۇداي قالاسا، قۇلدىراڭداپ ورالام عوي»، – دەپ جازدى ول.
سونداي-اق ول وتباسى جايلى دا ءسوز قوزعاعان.
«قۇدايعا شۇكىر ەكى ۇل، ءبىر قىز، ءتورت نەمەرەم بار. ءبارى ۋنيۆەرسيتەت تامامداعان ماماندىق يەلەرى. قىزىم ۋنيۆەرسيتەتتەن سوڭ كيمەپتە اعىلشىنشا وقىپ، سوندا اعىلشىن تىلىندە ساباق تا بەرگەن.
كەيىندە ەكى مينيسترلىكتە قىزمەت ىستەپ جۇرگەن ۇل، قىزىمدى كارىم ءماسىموۆ ءبىر-اق كۇندە جۇمىستان شىعارىپ جىبەرگەن- ەدى. وعان سەبەپ – مەنىڭ «ق.ءماسىموۆتىڭ قىتاي مەن رەسەيدىڭ جوعىن جوقتاپ، قازاق مۇددەسىن اياققا تاپتاپ وتىر» دەگەن ماقالامنىڭ جارىق كورۋى ەدى.
ءۇش بالام دا مەملەكەتتىك قىزمەتكە ماڭايلاتپاعان سوڭ، اۋلاقتانىپ قالىپ، ءتيىپ-قاشتى شارۋامەن كۇن كورىپ ءجۇر.
بارسەلونادان وقۋ ءبىتىرىپ كەلگەن نەمەرەمدى قىزمەتكە الۋىن سۇراپ ەلباسىعا حات تا جازعام. نازارباەۆتىڭ «تاپسىرۋىمەن» قالا اكىمى بولعان باۋىرجان بايبەك مىرزا نەمەرەمە ۇلتتىق سارايدىڭ اۋلا سىپىرۋشىسىنىڭ (دۆورنيك) ايلىعى 35 مىڭ ورىنباسارىنىڭ «لاۋازىمىن» ۇسىنىپ، مازاقتاعانداي توبەمنەن باسىپ، تومەن تۇقىرتقان.
ءيا، بۇل مەنىڭ وتباسىمنىڭ وزگەلەردەن وزباعان دا، قالماعان دا كۇيى عانا»، – دەپ جازدى قالامگەر.
ونىڭ سوزىنشە، تىركەۋگە قر ەڭبەك سىڭىرگەن قايراتكەرى دەگەن اتاعى جارامايدى. تىركەتۋگە كەرەگى – مەملەكەتتىك سىيلىقتىڭ لاۋرەاتى. نەمەسە جازۋشىدا قازاقستاننىڭ ەڭبەك ەرى اتاعى بولۋى ءتيىس.
