ستۋدەنتتىك شاعىن قيماي جۇرگەن بىلىمگەرلەرگە ارنالعان ولەڭدەر توپتاماسى

271

وقۋعا ءتۇسىپ، قولدارىنا ديپلوم الۋ — ءاربىر جاستىڭ الاۋلاعان ارمانى، ۇكىلەگەن ءۇمىتى. قازىرگى تاڭدا  ءبىتىرۋشى تۇلەكتەر ءدال وسىنداي شاتتىققا كەنەلۋدە. ەندەشە جۇرەكتەرى دۇرسۇلدەپ، ستۋدەنتتىك شاعىن قيماي جۇرگەن بىلىمگەرلەرگە ارناپ ستۋدەنتتەر تۋرالى ولەڭدەر توپتاماسىن نازارلارىڭىزعا ۇسىنىپ وتىرمىز. 

***

اۋىلدان الماتىعا كەشە كەلگەن،

ىزەتتى قىز ەكەنسىڭ شەشە كورگەن.

...ەركىندىكتىڭ ەسىگىن ەرتە اشىپسىڭ،

سۇرىنەدى ەكەنسىڭ نەشە جەردەن؟

اڭقىلداعان كوڭىلىڭنەن اينالايىن،

بۇلىنەدى ەكەنسىڭ نەشە جەردەن؟

 

كەشىر، قالقام، مەن ەمەس سۇر مەرگەنىڭ.

اشۋلانبا، بۇلدانبا، سىر بەرمەگىن.

ورمەك توقىپ وتىرعان مىستان-قالا

باياعىدا-اق ساپ قويعان سۇرلەۋلەرىن،

دايىنداپ سۋىق قولدى سۇر مەرگەنىن.

سوندا دا جۇماق بولسىن جۇرگەن جەرىڭ.

 

ءاپ-ادەمى، اياۋلى، ارلى كوزىڭ

جاسىرماي تۇرادى ەكەن بار مىنەزىن.

بۇل قالانىڭ تولقىنى كەيدە، ءتىپتى،

جارعا يتەرە سالادى ناردىڭ ءوزىن...

 

الماتىعا اۋىلدان كەشە كەلگەن،

ىزەتتى قىز ەكەنسىڭ شەشە كورگەن.

سۇرىنبەيمىن دەسەڭ دە نەشە جەردەن،

بۇلىنبەيمىن دەسەڭ دە نەشە جەردەن،

قالا دەگەن سونداي عوي، جەتەگىنە اپ،

جولمەن ەمەس، جۇرگىزەر كوشەلەرمەن.

 

مەن ءبىر جۇرگەن اعاڭمىن اق جول تىلەر

ال، قالعانىن كورەرسىڭ پەشەنەڭنەن!..

باقىت بەدەلحان

***

باستالماعان قالانىڭ داستانى ءالى

ءبىرىنشى جىل دالا دەپ جاس تامادى.

ءبىرىنشى جىل اۋىلى ەستەن كەتپەي،

بەسىنشى جىل قيمايدى استانانى.

 

و جاستىق-اي، المايتىن ولمەي تىنىم،

ويىن-تويسىز، ومىرگە كونبەيتۇعىن.

بيگە بارسا باراتىن ءبىر توپ بولىپ،

جالعىز ءجۇرۋ دەگەندى بىلمەيتۇعىن.

 

عاشىق بولساڭ ءتۇن پانا، تەرەك پانا،

سۇلۋ دەمى – دەم ەمەس – شاراپحانا.

قىزعا بارساڭ كيگەنىڭ – وزگەنىكى،

وزىڭدىكى – جالعىز-اق جۇرەك قانا!

 

ءومىر! ءومىر! – دەپ جاستىق ۇرانداي ما،

كەكىرەكتى كەرنەيدى ءبىر ءان مايدا.

ءبىر جىگىتكە ون قوناق مەيرام كۇنى،

ون جىگىتكە ءبىر بيلەت ترامۆايدا.

 

الماتىمىز جاستىقتىڭ باعى ىسپەتتەس،

قانشاما گۇل سول باققا قونىس تەپتى.

ءبىر جىگىتتىڭ ويىندا ون ارماننان،

ون جىگىتكە جالعىز-اق كونسپەكتى.

 

تاۋىسسا دا اقىرى ناندىق پۇلدى،

تارتپاي قويعان سەرىلىك، ساندىك كىمدى!

تۇنىمەنەن دۋىلداپ، كەلەسى كۇن

وتىرعانى ساباقتا قالعىپ-مۇلگىپ.

 

كەرەمەت قوي، قىزىق قوي سەزىم دەگەن،

كوكتەمدە كىم ۇيدەن بەزىنبەگەن!

ون اي بويى ماسايراپ ويناعاندار

ەمتيحاندا وتىز كۇن كوز ىلمەگەن.

 

سودان كەيىن الگىنى اششىسىنباي،

جۇتىپ-جۇتىپ جىبەرىپ تۇششى سۋداي،

تۋعان جەرگە ۇزاتىپ تۇرعاندارى

ءبىرىن-ءبىرى ءبىر ەلدىڭ باسشىسىنداي!

قادىر مىرزا ءالي

***

كىرىسپە

تالاپكەرمىز-ابيتۋريەنت،

العاش كەلگەن اۋىلدان.

ءتۇرىمىز دە،كيگەن كيىم،

وقشاۋ ەدى قاۋىمنان.

 

وقشاۋ ەدى ءجۇرىسىمىز،

ەرەكشە ەدى ءسوزىمىز.

تەسىلەمىز كىتاپقا ءبىز،

ۇرەي تولى كوزىمىز.

 

ەرتەڭ سىناق دەگەن كۇنى،

وتپەي قويدى ءتۇنىمىز.

تەست بولاتىن سول ءبىر ساتكە،

جەتتىك ارەڭ، ءبىلىڭىز.

 

پەرىشتەنىڭ قۇلاعىنا،

ءىلىنىپتى ءۇنىمىز.

بۇگىن ءبىزدىڭ ەڭ باقىتتى –

ستۋدەنت بولعان كۇنىمىز.

 

ءى كۋرس 

كورپۋس ءىشى قانداي عاجاپ،

تاڭىرقايمىز،قارايمىز.

جىلى سويلەپ بىرەۋ كەلسە،

جاقسىعا ونى بالايمىز.

 

ارقايسىمىز ءار اۋىلدان،

كەلگەن قازاق بالاسى.

جۇزدەن جۇيرىك،مىڭنان تۇلپار،

دارالاردىڭ داراسى.

 

ءبارى قۇشتار ۇيرەنۋگە،

ساباقتان ءبىر قالمايدى.

لەكتسيانى جازۋدان دا،

قولىمىز ەش تالمايدى.

 

ەشقايسىمىز ەرىنبەيمىز،

د/ش-عا دا بارامىز.

ساباقتان سوڭ وقۋ زالدا،

كەش باتقانشا بولامىز.

 

ءىى كۋرس 

قىركۇيەكتە كەلە سالىپ،

“پەرۆاشتاردى” سىنادىق.

جەكە-جەكە شاقىرىپ اپ،

مەكەن-جايىن سۇرادىق.

 

بىلتىرعىعا قاراعاندا،

ءبىراز بىزدە “ستاج” بار.

بۇرىنعىداي ەمەس-ءبارى

–  دوس سياقتى ۇستازدار.

 

ۇستازدارمەن ارالاسىپ،

ەلدەن سارقىت اكەلدىك.

جاقسى وقىپ، كوزگە تۇستىك،

ابىروي دا جەتەرلىك.

 

ءىىى كۋرس 

ويحوي، شىركىن، ستۋدەنت شاق،

نەتكەن، قىزىق، تاماشا!

ءبىر كۇنىمنەن ءبىر كۇن قىمبات،

سالىستىرىپ قاراسا.

 

كۇندە قىزىق، كۇندە دۋمان،

ساۋىق قۋعان بويداقپىز.

تۋعان كۇندەر نەتكەن كوپ ەد،

قۇر جىبەرمەي تويلاپپىز.

 

قالا شىقساڭ، دارا شىقساڭ،

قىز-جىگىتتەر مەكەنى.

ستۋدەنت شاق، قانداي اسەم،

ءار كۇن قىزىق وتەدى.

 

IV كۋرس 

قادىرلەيمىز بۇل مەكەننىڭ،

ءاربىر ءشوبىن، تاسىن دا.

اقىل ايتار “قاريامىز”،

كىشكەنتايلار قاسىندا.

 

ءتىپتى، مۇلدەم قارتايىپ تا،

قالعانبىز-اۋ شاماسى.

بىرگە وقىعان كەيبىرەۋدىڭ،

جەتەگىندە بالاسى.

 

دۋمان قۋىپ ءبىز جۇرگەندە،

باس قۇراعان بىرەۋلەر.

ءيا، ەندى بار قىزىقتىڭ،

شەگى جەتتى تىرەلەر.

 

ءومىر دەگەن قىزىق ەكەن،

وتكەن كۇندەر ارداقتى-اق.

ء“تورت جىل ءبىزدىڭ ءار كۇنىمىز،

بوسقا وتكەن بە سالپاقتاپ؟”

 

-  دەپ بىرەۋلەر جار ىزدەيدى،

ساباق بىتەر كەزىندە.

الاسۇرا وت جاعادى،

جۇرەك دەگەن سەزىمگە.

 

سىناق بىتەر، اياقتالار،

ديپلوم دا قولىڭدا.

سىڭارلارىن تاپپاعاندار،

قىزمەت ىزدەۋ جولىندا!

 

"ادىرنا" ۇلتتىق پورتالى

پىكىرلەر