مەملەكەت باسشىسى قاسىم-جومارت توقاەۆ ۇلتتىق قۇرىلتايدا تۇرمىستىق زورلىق-زومبىلىق پەن بۋللينگ ماسەلەسىن كوتەردى، دەپ حابارلايدى «ادىرنا» ءتىلشىسى.
«تۇرمىستىق زورلىق-زومبىلىق، بۋللينگ پەن اگرەسسيا دا قازىرگى ۋاقىتتاعى قاتەرلى ءۇردىس. اشىعىن ايتساق، قوعامدا قاتىگەزدىك كۇشەيىپ بارادى. بىرەۋگە ءتىل تيگىزىپ، ار-نامىسىن تاپتاپ، ءتىپتى، ۇرىپ-سوعۋعا دايىن تۇراتىندار از ەمەس.
جەدەل جاردەم جانە قوعامدىق كولىك جۇرگىزۋشىلەرىنە شابۋىل جاسالعانىن بىلەسىزدەر. ادامعا الىمجەتتىك كورسەتۋ، قورلاۋ دۇرىس ەمەس. مۇنداي تەرىس ارەكەتتەرگە كوز جۇما قاراۋعا بولمايدى. «اۋرۋىن جاسىرعان ولەدى». سوندىقتان ءبىز وسى قوعامدىق دەرتتى جاسىرماي، اشىق ايتۋىمىز كەرەك
ازاماتتارىمىز ۇيدە دە، تۇزدە دە ءوزىن قاۋىپسىز سەزىنۋگە ءتيىس. ءبىر سوزبەن، قاۋىپسىز ورتادا ءومىر ءسۇرۋى كەرەك. زاڭ مەن ءتارتىپ قاتاڭ ساقتالۋعا ءتيىس، ياعني قوعامدا زاڭ ۇستەمدىگى بولۋى قاجەت. ەڭ باستىسى، ءبىز مەيىرىمدى ءارى مادەنيەتتى ۇرپاق تاربيەلەۋىمىز كەرەك»،—دەدى ول.
سونداي-اق پرەزيدەنت ۆانداليزم تۋرالى دا ايتا كەتتى.
«وكىنىشكە قاراي، قوعامدىق مۇلىكتەن باستاپ، مىڭجىلدىق مادەني مۇرالارعا دەيىن – ءبارىن جاپپاي ءبۇلدىرۋ كەيىنگى كەزدە ادەتكە اينالعان. بۋرابايداعى جۇمباقتاستى، باياناۋىلداعى كەمپىرتاستى قاراڭىزدار. ەڭ جاۋھار جەرلەرىمىزدىڭ سۇلۋلىعى شيمايدىڭ استىندا قالىپ جاتىر. ۇيدەگى ءليفتىنى، اۋلاداعى ويىن الاڭىن، كوشەدەگى ايالدامانى قيراتۋدىڭ قانداي قيسىنى بار؟! مۇنىڭ ءبارى – بارىپ تۇرعان تارتىپسىزدىك، مادەنيەتسىزدىك.
وركەنيەتتى ەلدىڭ ءاربىر ازاماتى قوعام مۇلكىن ءوز مۇلكىندەي قورعاۋى كەرەك. دۇنيە جۇزىندە، ناقتى ايتقاندا، جاپونيادا، وڭتۇستىك كورەيادا، قىتايدا، سينگاپۋردا جاعىمدى مىسالدار كوپ، وسى ەلدەر كوپكە ۇلگى بولىپ وتىر. ال ءبىز نەگە ولاردان كەم بولۋىمىز كەرەك؟»—دەدى مەملەكەت باسشىسى.
