تالدىقورعانداعى نازارباەۆ زياتكەرلىك مەكتەبىندە ۆيرتۋالدى ۋنيۆەرسيتەتتەر جارمەڭكەسى ءوتتى.
ءىس - شاراعا NIS-ءتىڭ 100 وقۋشىسى قاتىستى.
كارلتون ۋنيۆەرسيتەتى (كانادا), EDHEC بيزنەس مەكتەبى (فرانتسيا), كەمبريدج ۋنيۆەرسيتەتى (ۇلىبريتانيا), اريزونا مەملەكەتتىك ۋنيۆەرسيتەتى (اقش), برەمەن كونسترۋكتورلىق ۋنيۆەرسيتەتى (گەرمانيا), گونكونگ ۋنيۆەرسيتەتى سياقتى ءارتۇرلى ەلدەردىڭ 39 ۋنيۆەرسيتەتى بولاشاق ستۋدەنتتەرگە قىزىقتىراتىن سۇراقتارى بويىنشا كەڭەس بەردى.
جارمەڭكە بارىسىندا وقۋشىلار بەينە چاتتار، ماتىندىك چاتتار، پرەزەنتاتسيالار جانە ونلاين سەسسيالار سياقتى ءارتۇرلى كوممۋنيكاتسيا فورماتتارىن پايدالانىپ ۋنيۆەرسيتەت وكىلدەرىمەن بەلسەندى ارالاستى. سونداي-اق بالالار ءتۇرلى پىكىرتالاستارعا قاتىسىپ، حالىقارالىق ءبىلىم بەرۋ مۇمكىندىكتەرىن تالقىلاپ، ۋنيۆەرسيتەت وكىلدەرىنە سۇراقتار قويدى.
ستوني برۋكتاعى نيۋ-يورك مەملەكەتتىك ۋنيۆەرسيتەتىنىڭ كەڭەسشىسى پال كريميمەن سويلەسۋ بارىسىندا مەن ۋنيۆەرسيتەتتىڭ 100% گرانت بەرە المايتىنىن ءبىلدىم. ءبىر ۋاقىتتا بىرنەشە ۋنيۆەرسيتەتتەردى قامتي وتىرىپ، سايتتى زەرتتەپ قانا قويماي، ولارمەن بايلانىسىپ، سۇراقتارعا جاۋاپ العان، كەرەمەت مۇمكىندىك، - دەپ ءوز پىكىرىمەن ەدۆارد ني، 11-سىنىپ وقۋشىسى ءبولىستى.
فوردحەم ۋنيۆەرسيتەتىنىڭ وكىلىمەن ءتىل تابىسا الدىم. بۇل نيۋ-يورك قالاسىنداعى ءۇش كامپۋستى الىپ جاتقان امەريكاندىق جەكە ۋنيۆەرسيتەت. ەڭ تومەنگى تالاپ ەتىلەتىن ILTS, SAT ۇپايلارى، بۇل ۋنيۆەرسيتەتكە ءتۇسۋ ءۇشىن تاعى نە دايىنداۋ كەرەك، تۇرمىس جاعدايى قانداي، تولىق گرانت بار ما، جوق پا، سونى ءبىلدىم، - ءمادي تەمىرتاس، 11 سىنىپ وقۋشىسى.
ءوز كەزەگىندە، قاتىسۋشى ۋنيۆەرسيتەتتەر وقۋشىلارعا بولاشاق ءبىلىم الۋ مۇمكىندىكتەرى تۋرالى تۇسىنىكتەرىن كەڭەيتۋگە مۇمكىندىك بەرەتىن كاسىبي باعىتتاردى قامتيتىن ءارتۇرلى ءبىلىم بەرۋ باعدارلامالارىن ۇسىندى.
