قىزىلوردا وبلىسىنىڭ فينليانديا، ەستونيا مەملەكەتتەرىندە وتكەن ونەر كۇندەرى ودان ءارى يسپانيانىڭ مادريد قالاسىندا جالعاسىپ، ۇلىستىڭ ۇلى كۇنىنە ارنالعان كونتسەرتپەن قورىتىندىلاندى.
ەۋروپا جۇرتشىلىعى ناۋرىز مەرەكەسىنىڭ تاريحي جانە مادەني ماڭىزى تۋرالى مول اقپاراتقا قانىقتى. ساپاردىڭ ماقساتى دا وسى، ياعني قازاق حالقىنىڭ ۇلتتىق مۇراسىن الەم جۇرتشىلىعىنا تانىستىرۋ، شىعارماشىلىق ۇجىمدارمەن تاجىريبە الماسۋ بولاتىن.
«NAURYZ – CELEBRATION OF SPRING» اتاۋىمەن وتكەن كونتسەرتكە كورەرمەن كوپ جينالدى. وندا قازاقستاننىڭ يسپانيا كورولدىگىندەگى توتەنشە جانە وكىلەتتى ەلشىسى دانات مۇساەۆ پەن لەگانەس قالاسى اكىمىنىڭ ورىنباسارى دەلگادو كارلوس ءسوز سويلەپ، سىر ەلىنىڭ ونەرپازدارىنا العىس ءبىلدىردى.
باي مادەنيەتى، تاريحى جانە تاماشا تابيعاتىمەن ايگىلى يسپانيا ەلى ءوزىنىڭ تامىرى تەرەڭ ونەرىن، عاجايىپ ساۋلەتىن ماقتانىش ەتەدى. قازاقتىڭ ءداستۇرلى مۋزىكاسى مەن ۇلتتىق ونەرىنەن ۇندەستىك تاپقاندىقتان، كورەرمەن قاۋىم ساحنادا شىرقالعان ءان-جىرعا، جالپى كونتسەرتتىك باعدارلاماعا زور قىزىعۋشىلىق تانىتتى. قىزىلوردا وبلىستىق فيلارمونياسىنىڭ ونەرپازدارى كۇن مەن ءتۇننىڭ تەڭەلەتىن، كۇللى تىرشىلىك قايتا تۇلەيتىن تابيعات مەرەكەسىنىڭ بار بوياۋىن جارقىراتىپ ۇسىندى. «جاراپازان» ايتىلىپ، قازاقتىڭ يگى داستۇرىمەن شاشۋ شاشىلدى. ناۋرىز- دۋماننىڭ باستالعانىن «تويباستار» انىمەن كورسەتىپ، قالا تۇرعىندارى مەن قوناقتارىنا، دياسپورا مۇشەلەرىنە، قازاقستاندىق جانە شەتەلدىك ستۋدەنتتەرگە ۇلت قازىناسىنىڭ مول مۇراسى تۋرالى ماعلۇمات بەردى.
كونتسەرتكە «اقمەشىت» فولكلورلىق ءانسامبلى (جەتەكشىسى – نۇرعيسا نۇرباي), رۋسلان احمەتوۆ، شولپان بيمبەتوۆا، سامال بايسەيتوۆا، اقمارال نوعايباەۆا، مارات سۇگىرباي، مۇحتار نيازوۆ، باعداۋلەت قارعاباەۆ، سىمبات تاسبەرگەنوۆا، ماعجان امانجولوۆ، اقىلبەك تابىنباەۆ، توقتار اعىراەۆ، اقنۇر امانباەۆا، ءسابيت دىلداباەۆ، الماس ءالجانوۆ، زامانبەك نىسانباەۆ، ارمان تولەش قاتىسىپ، ونەر كورسەتتى.
گاسترولدىك ساپاردا كورەرمەنگە كونتسەرتتىك باعدارلامامەن قاتار، قازاق حالقىنىڭ ۇلتتىق تاعامدارى ۇسىنىلدى. ۇلتتىق ناقىشپەن بەزەندىرىلگەن سىي-سياپات تا تاراتىلدى.
