اقمولا وبلىسىندا كولىك ىشىنەن تابىلعان پوليتسيا قىزمەتكەرى مەن بەيبىت تۇرعىننىڭ نەدەن ولگەنى بەلگىلى بولدى، دەپ حابارلايدى "ادىرنا" ۇلتتىق پورتالى.
«5 ناۋرىز كۇنى ساعات 8.05-تە ەسىل اۋداندىق پوليتسيا بولىمىنە ەسىل اۆتوجۋ مەكەمەسىنىڭ اۋماعىندا Audi A6 اۆتوكولىگىنىڭ سالونىنان ەكى جىگىتتىڭ ءمايىتى تابىلعانى تۋرالى اقپارات ءتۇستى. ازاماتتاردىڭ تۇندە كولىگىن كولىك جۋ ورنىنا اپارىپ، ۇيىقتاپ كەتكەنى انىقتالدى»، - دەپ حابارلايدى اقمولا وبلىسى ءىىد ءباسپاسوز قىزمەتى.
زورلىق-زومبىلىق ءىزى تابىلماعانى اتاپ ءوتىلدى. ساراپتاما تاعايىندالدى. الدىن الا مالىمەت بويىنشا، ازاماتتار كومىرتەگى توتىعىنان ۋلانۋ سەبەبىنەن قايتىس بولدى دەلىنەدى.
اقمولا وبلىستىق پوليتسيا دەپارتامەنتىنىڭ ءباسپاسوز قىزمەتى مارقۇمداردىڭ ءبىرى ەسىل اۋدانىندا پوليتسيا قىزمەتكەرى ەكەنىن راستادى. بەلگىلى بولعانداي، قايتىس بولعان پوليتسيا سەرجانتى ۋاقىتشا ۇستاۋ يزولياتورىندا جۇمىس ىستەگەن.
بۇعان دەيىن اقمولا وبلىسىندا ەكى ەر ادامنىڭ كولىك ىشىنەن ءولى تابىلعانى تۋرالى حابارلاعان بولاتىنبىز.
