ءبىر توپ حالىقارالىق قۇقىق قورعاۋشىلار تۇركىمەنستانعا كەلگەن ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (ەقىۇ) باس حاتشىسى حەلگا ءشميدتى بۇل ەلمەن ىنتىماقتاستىقتى كەڭەيتۋدەن باس تارتۋعا شاقىردى. وسىعان قاتىستى تۇركىمەن حەلسينكي ادام قۇقىقتارى قورىنىڭ (THF) سايتىندا 20-دان استام قۇقىق قورعاۋ ۇيىمى وكىلدەرىنىڭ ۇندەۋى جاريالاندى، دەپ حابارلايدى "ادىرنا" ۇلتتىق پورتالى fergana.agency سايتىنا سىلتەپ.
قول قويۋشىلار حەلگا شميدتەن تۇركىمەنستان پرەزيدەنتى سەردار بەردىمۇحامەدوۆكە اشحابادتىڭ حالىقارالىق ادام قۇقىقتارى مەن ەقىۇ مىندەتتەمەلەرىن ورىنداماعانىنا قاتىستى الاڭداۋشىلىق ءبىلدىرۋىن سۇرادى.
ۇندەۋدە «ەقىۇ تۇركىمەنستانمەن ىنتىماقتاستىعىن ادام قۇقىقتارى سالاسىنداعى تۇيتكىلدى ماسەلەلەردى شەشۋدە ايتارلىقتاي تەكسەرىلەتىن پروگرەسكە قول جەتكىزبەيىنشە كەڭەيتپەۋى كەرەك»، - دەلىنگەن.
قۇقىق قورعاۋشىلار تۇركىمەنستانداعى ارىپتەستەرىن قۋدالاۋدىڭ بىرنەشە مىسالىن كەلتىردى. وعان زاڭگەر ءارى بەلسەندى پىعامبەرگەلدى اللابەردىەۆ پەن جۋرناليست سولتان اچيلوۆا سىندى بيلىكتى سىناۋشىلارعا شەتەلگە بارۋدان باس تارتقانىن ەسكە سالدى.
سونداي-اق قول قويعان تاراپتار تۇركىمەنستاننىڭ 2003 جىلدان بەرى بۇل ساياساتتى بۇۇ-دا بىرنەشە رەت سىنعا العانىنا قاراماستان بيلىك ءوز وپپونەنتتەرى دەپ سانايتىن جۇزدەگەن ادامداردى ۇزاق ۋاقىت بويى بايلانىسسىز (سىرتقى الەممەن بايلانىسسىز) ۇستاۋدىڭ زاڭسىز تاجىريبەسىن توقتاتپاعانىن ەسكە سالدى.
ولار تۇركىمەنستان مۇشە بولىپ تابىلاتىن ەقىۇ تۇرىكمەنستان بيلىگىن تەز ارادا:
- اللابەرديەۆتى، اچيلوۆانى جانە باسقا بەلسەندىلەردى ساياسي ۇستانىمى جانە ءسوز بوستاندىعى قۇقىعىن زاڭدى تۇردە جۇزەگە اسىرعانى ءۇشىن قۋدالاۋدى توقتاتۋعا;
- باس بوستاندىعىنان ايىرۋ ورىندارىندا كۇشتەپ جوعالىپ كەتۋدى توقتاتۋ جانە جازاسىن وتەۋ مەرزىمى وتكەن بارلىق ادامداردى بوساتۋعا;
- تۇركىمەنستان ازاماتتارىن ەل ىشىندە جانە شەتەلدە زورلىق-زومبىلىقسىز ازاماتتىق ارەكەتى ءۇشىن قۋدالاۋ، قورقىتۋ جانە جازالاۋ تاجىريبەسىن توقتاتۋعا شاقىردى.
ەقىۇ باس حاتشىسى حەلگا ماريا شميد 4-6 ناۋرىز ارالىعىندا قىرعىزستان، تاجىكستان، تۇركىمەنستان، وزبەكستاننىڭ قورشاعان ورتانى قورعاۋ مينيسترلەرىمەن، سونداي-اق قازاقستاننىڭ قورشاعان ورتانى قورعاۋ ءمينيسترىنىڭ ورىنباسارىمەن كەزدەسۋ ءۇشىن تۇركىمەنستانعا بارادى. اشحابادتا ورتالىق ازياداعى قاۋىپسىزدىك پەن تۇراقتىلىق ءۇشىن كليماتتىڭ وزگەرۋىنىڭ سالدارى، ترانسشەكارالىق سۋدى باسقارۋ سالاسىنداعى ايماقتىڭ پروبلەمالارى، ەنەرگەتيكالىق قاۋىپسىزدىك، اپاتتار قاۋپىن ازايتۋ ماسەلەلەرى جانە ت.ب. تاقىرىپتار بويىنشا پىكىرتالاس وتەدى.
حەلگا ءشميدتى تۇرىكمەنستان پرەزيدەنتى سەردار بەردىمۇحامەدوۆ قابىلدايدى دەپ كۇتىلۋدە. ول سونداي-اق ورتالىق ازيانىڭ بارلىق ەلدەرىندەگى ەقىۇ ميسسيالارى باسشىلارىنىڭ جىل سايىنعى كەزدەسۋىنە توراعالىق ەتەدى.
