باتىس قازاقستان وبلىسىندا مۇلىكتى بولىسكىسى كەلمەگەن ايەلدىڭ كۇيەۋىن ولتىرۋگە كيللەر جالداعانى ايتىلدى. جەدەل ءىس-شارالار بارىسىندا پوليتسيا تاپسىرىسپەن كىسى ءولتىرۋدى توقتاتتى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
«قىلمىستى ۇيىمداستىردى دەگەن كۇدىكپەن ەكى تۇرعىن ۇستالدى. قىلمىسقا تاپسىرىس بەرۋشى كۇيەۋىمەن مۇلىكتى بولىسكىسى كەلمەيتىن ايەل ەكەنى انىقتالدى»،— دەلىنگەن حابارلامادا.
كۇدىكتىلەردەن ولاردىڭ كىناسىن راستايتىن زاتتاي دالەلدەمەلەر تاركىلەندى. تەرگەۋ مالىمەتتەرى بويىنشا، قارۋدى ساتىپ الۋ جانە كىسى ءولتىرۋدى ورىنداۋ ءۇشىن تاپسىرىس بەرۋشى ۇيىمداستىرۋشىعا 1,3 ملن تەڭگە بەرگەن.
قازىرگى تاڭدا قىلمىستىق ءىس كىسى ولتىرۋگە وقتالۋ فاكتىسى بويىنشا تەرگەلىپ جاتىر. كۇدىكتىلەر 20 جىلعا دەيىن باس بوستاندىعىنان ايىرىلۋى مۇمكىن.
