تالدىقورعان قالاسىنداعى نازارباەۆ زياتكەرلىك مەكتەبىندە ءداستۇرلى «اكەلەر فورۋمى» ءوتتى. ديالوگ الاڭىنا 100-دەن استام اكەلەر قاتىستى.
ۇلتتىق قۇندىلىقتار مەن وتانسۇيگىشتىك، بالالاردىڭ ەموتسيونالدىق تاربيەسىندەگى ەرلەردىڭ ءرولى، ومىرلىك داعدىلار تاقىرىپتارى تالقىلاندى.
حالىقارالىق زەرتتەۋلەردە بالا تاربيەسى مەن دامۋىنا اكەلەردىڭ ىقپالى ەرەكشە دەيدى. بىراق سونىمەن بىرگە اكەلەردىڭ ءوز بالالارىنىڭ ومىرىنە ارالاسۋى ەڭ بەلسەندى قاتىسۋدان نەمقۇرايلىلىققا دەيىن ءارتۇرلى بولۋى مۇمكىن. ال بۇل كۇن – بالالارىمىزدىڭ تاربيەسى مەن دامۋىنداعى ماڭىزدى ماسەلەلەردى تالقىلاۋ ءۇشىن باس قوساتىن ەرەكشە ءسات. ويتكەنى قازىرگى قوعام اتا-انالارعا جاڭا مىندەتتەر قويىپ وتىر، — دەدى قۇتتىقتاۋ سوزىندە تالدىقورعان قالاسىنداعى NIS ديرەكتورى ۆيكتور سوسين.
بۇل كۇنى پەداگوگ-پسيحولوگتار مەن كۋراتور-ۇيىمداستىرۋشىلار اكەلەر ءۇشىن ترەنينگتەر ۇيىمداستىردى.
بۇل تاماشا شاراعا ەكىنشى جىل قاتىسىپ وتىرمىن. قازىرگى زاماندا اكەنىڭ ءرولى شىنىمەن دە سان قىرلى. ءبىز بالالارىمىزعا، ولاردىڭ بىلىمىنە جانە قىزىعۋشىلىقتارىنا كوڭىل ءبولۋدى ءىشىنارا ۇمىتامىز. ءتىپتى بالامەن سويلەسكەندە ىڭعايسىزدانىپ، جاعداي وزدىگىنەن شەشىلەدى دەپ ويلايتىن كەزدەر بولادى. وسىنداي فورۋمنىڭ ارقاسىندا اكە – بالاسىنىڭ ومىرىندەگى باستى تۇلعا ءارى تىرەك ەكەنىن ەسكە سالاسىزدار، – دەپ اتا-انا ورىنبەك بايمەنوۆ ءوز پىكىرىمەن ءبولىستى.
اكەلەر بالالارىنا حات جازۋدا ەرەكشە سەزىمدە بولدى، ال بالالار دا بۇل كۇنى اكەلەرىنە ارناپ حات جولدارىن ارنادى.
فورۋم وقيعاعا تولى بولدى. شىنىندا دا، ءبىز قۇندى اقپارات الدىق، ناقتى ومىرلىك جاعدايلاردى تالداپ، شەشىمدەردى بىرگە تاپتىق. 21 عاسىر اكەسى – وتاعاسى عانا ەمەس، ۇستاز، تاربيەشى بولىپ كەلەدى، — دەيدى ەكى ۇلدىڭ اكەسى ەسبولات جۇماعۇلوۆ.
اكەلەر فورۋمى اتا-انا مەن بالا اراسىنداعى قارىم-قاتىناس ماسەلەلەرىن، ۇستاز بەن شاكىرت اراسىنداعى تۇسىنىسپەۋشىلىكتەردى پاش ەتكەن «مۇعالىم» تەاترلاندىرىلعان قويىلىمىمەن اياقتالدى.
