قازاقستاندىق جانكۇيەرلەر تۇركيانىڭ انتاليا قالاسىندا العاش رەت وتكەن قازاقستان سۋپەركۋبوگىنىڭ فينالى كەزىندە توبەلەس شىعاردى. بۇل تۋرالى جەلىدە ۆيدەو تارادى، دەپ حابارلايدى “ادىرنا” ۇلتتىق پورتالى.
ويىندا شىمكەنتتىك "ورداباسى" مەن قوستانايلىق "توبىل" كەزدەسكەن.
سپورتتىق شارادا تۇركيادا تۇراتىن وتانداستارىمىز بەن ويىنعا ارنايى كەلگەن قازاقستاندىق جانكۇيەرلەر باس قوستى. ەكىنشى تايمنىڭ ورتاسىندا تريبۋنادا باستالعان توبەلەس جانكۇيەرلەردىڭ ءبىر-بىرىنە ورىندىق لاقتىرۋىنا ۇلاسقان.
جاپپاي توبەلەسكە جانكۇيەرلەر تۇرعان سەكتوردىڭ ءبىر-بىرىنەن الشاق بولماۋى سەبەپ بولعان. ويىن قورىتىندىسى بويىنشا ەسەپ 1:1 بولىپ، ماتچ تەڭ اياقتالدى. ال پەنالتيلەر سەرياسىنىڭ قورىتىندىسى بويىنشا "توبىل" 6:5 ەسەبىمەن جەڭىسكە جەتتى.
