Májilis turmystyq zorlyq-zombylyq kórsetkenderge jáne pedofılderge qatysty jańa qatań zań jobasyn maquldady, dep habarlaıdy "Adyrna" ulttyq portaly.
«Kámeletke tolmaǵan balany óltirgeni jáne pedofılııa úshin olar ómir boıyna bas bostandyǵynan aıyrylady. Májilis áıelder men balalardyń quqyqtary men zańdy múddelerin qorǵaýǵa baǵyttalǵan zańnamalyq túzetýlerdi birinshi oqylymda maquldady. Zań jobalaryn Májilis depýtattary memleket basshysynyń Qazaqstan halqyna joldaýynda aıtylǵan tapsyrmalaryn iske asyrý maqsatynda ázirledi», - delingen sársenbi kúni taratqan habarlamada.
Zańnamalyq túzetýler 5 baǵytty qamtıdy. Atalmysh jobany sársenbi kúni Májilis minberinde depýtat Juldyz Súleımenova qorǵady.
Birinshiden, qylmystyq jaýapkershilik qalpyna keltiriledi:
–densaýlyqqa qasaqana jeńil zııan keltirý – 200 AEK deıingi mólsherde aıyppul salýǵa ne sol mólsherde túzeý jumystaryna ne 200 saǵatqa deıingi merzimge qoǵamdyq jumystarǵa tartýǵa ne 50 táýlikke deıingi merzimge qamaýǵa alýǵa jazalanady;
– zorlyq-zombylyq jasaǵany úshin – 80 AEK-ke deıingi mólsherde aıyppul salý nemese 80 saǵatqa deıin qoǵamdyq jumystarǵa tartý, ne 25 táýlikke deıin qamaýǵa alý.
"Turmystyq zorlyq-zombylyq úshin ákimshilik jáne qylmystyq jaýapkershilik kúsheıtildi. Biraq osyǵan qaramastan, zorlyq-zombylyqtyń tolastamaýy áıelderdiń quqyǵyn qorǵaý, balalardyń qaýipsizdigin saqtaý zańnamasyn qatańdatýmen birge, qoǵamda qylmysqa múldem tózbeýshilik prınıpi, zań men tártiptiń qatań saqtalýy dáriptelip, nasıhattalýyn qajet etedi. Sol kezde qabyldanǵan zańdar sapaly oryndalatyn bolady. Zań men Tártip qaǵıdaty Qazaqstan qoǵamynyń ıdeologııalyq temirqazyǵyna aınalýǵa tıis dep oılaımyn" dedi Súleımenova.
