تۇركىستان وبلىسى ارىس قالاسىندا جارىلىس بولعان ساتتە ۇبت وتكىزۋ ورتالىعىندا بولعان بعم قىزمەتركەلەرى QAZAQSTAN ۇلتتىق ارناسىنىڭ تىكەلەي ەفيرىندە، بولعان وقيعانى بايانداپ بەردى. ولار تولعاعى قىسقان جۇكتى ايەلدى بوساندىرىپ العان.
«جارىلىس بولعان ۋاقىتتا نە ىستەرىمىزدى بىلمەي، قاشا باستادىق. قالانى بىلمەگەندىكتەن، قايدا بارارىمىزدى بىلمەدىك. اياعىمىز قانسىراي جۇگىردىك. سىرتتا كولىكتەر بالالاردى الىپ كەتىپ جاتتى. ءبىز بالالار بارسىن دەپ، كولىككە وتىرمادىق. جاياۋ جۇردىك. ءبىر كەزدە جاس جىگىت توقتادى. ەسىمى دوسمۇحامەد. ءبىزدى 41-اۋىلعا دەيىن جەتكىزىپ تاستادى. جول بويىندا اجەلەردى، بالالاردى الدى»، - دەيدى بعم قىزمەتكەرى جانات نۇرجۇمانوۆا. ولار جۇكتى ايەلدى كورىپ، بوسانۋعا كومەكتەسكەن. بالبوپە وتەنوۆا مەن جانات نۇرجۇمانوۆا، شايزا دوسكاەۆا، اقجار اۋىلىندا بارار جولدا جۇكتى ايەلدى بوساندىردى.
«جۇكتى ايەل وتە مىقتى ەكەن. تاڭەرتەڭ تولعاعى باستالىپ، ارىسقا اۋرۋحاناعا بارعان. الايدا جارىلىس بولىپ، ول جەردەن اكۋشەرمەن بىرگە قاشقان. بىرنەشە شاقىرىمدى جاياۋ جۇرگەن. ءبىزدىڭ كولىك توقتاعانعا دەيىن جاياۋ ءجۇرىپتى. جۇكتى ايەلدىڭ شىدامى تاۋىسىلعاندا ءبىرىنشى كەزدەسكەن ۇيگە توقتادىق. ءبارى ءساتتى ءوتتى»، - دەدى بالبوپە وتەنوۆا.
ايتۋىنشا، ءسابيدىڭ سالماسى ۇلكەن بولعاندىقتان بوساندىرۋ دا قيىنعا سوعىپتى.
«بويجەتكەن قۋانىشتان بالاسىنىڭ ەسىمىن كولىك جۇرگىزۋشىسىنىڭ قۇرمەتىنە قويماق ەدى. ومىرگە كەلگەن ءسابي قىز بالا بولدى. سوندىقتان جۇرگىزۋشىنىڭ اناسىنىڭ ەسىمىمەن كاميلا دەپ قويدى»، - دەيدى ول.
بوسانعان ايەلدىڭ ەسىمى كەنجە. 1996 جىلى تۋعان قىز. بۇل ونىڭ ەكىنشى بالاسى ەكەن. مينيسترلىك قىزمەتكەرلەرى ايەلدىڭ كۇيەۋىنە اكە بولعانىن حابارلاپ، وزدەرى ءارى قاراي كەتە باردى.
يلحام يبراگيم
"ادىرنا" ۇلتتىق پورتالى
