قازۇۋ-دان شىققان تىزىمنەن كەيىن حالىق اراسىندا دۇربەلەڭ باستالعان. ستۋدەنت قىزداردىڭ اناسى زاڭگەرگە شاعىمدانىپ، مۇڭىن شاققان، دەپ حابارلايدى "ادىرنا" ءتىلشىسى Massaget.kz-كە سىلتەپ.
"Human Rights Lawyers" باسشىسى، زاڭگەر ءلاززات راقىشەۆانىڭ ايتۋىنشا "پاك قىزدار" تىزىمىنەن كەيىن وقىرماندارى ءتۇرلى حات جولداعان.
"الماتىداعى جوعارى وقۋ ورىندارىنىڭ ءبىرى ستۋدەنت قىزداردىڭ پاكتىگى تەكسەرگەن ءتىزىم الەۋمەتتىك جەلىگە جاريالانىپ، ەل ىشىندە دۋ-دۋ اڭگىمە. ەلدىكى وسەك، تالقىلاۋ، ال بىرەۋلەر ءۇشىن تىنىش ءومىردىڭ استاڭ-كەستەڭى شىعىپ جاتىر", - دەپ جازدى زاڭگەر.
راقىشەۆاعا ستۋدەنت قىزداردىڭ ءبىرىنىڭ اناسى حابارلاسىپ، مۇڭىن ايتقان. ايەلدىڭ ايتۋىنشا قىزى 5 جاسىندا 25 جاستاعى پەدوفيل كورشىدەن قورلىق كورگەن. كەيىننەن كىشكەنتاي قىزدى زورلاعان ازامات 9 جىلعا عانا سوتتالعان. الايدا تەمىر توردىڭ ارتىندا تەك 7 جىل عانا وتىرىپ، تاعى ادام ءولتىرىپ سوتتالىپتى.
سۇمدىقتى ۇمىتۋى ءۇشىن اناسى قىزىن مامانعا دا اپارىپ، تۋعان اۋىلىنان كوشىپ باسقا قالاعا قونىس اۋدارعان كورىنەدى. ءدال سول وقيعادان بەرى 15 جىل ءوتىپ، قىزىنىڭ اتى قازۇۋ تىزىمىندە جاريالانىپتى.
اشىنعان انا ۇكىمەتتەگىلەردىڭ زورلانعانداردى قورعامايتىنىن ايتىپ، نارازىلىق ءبىلدىردى
ء"بىزدىڭ ەلدە كىمگە سەنىم بار وسى؟ نە ورگان، نە وقۋ ورنى قورعاي المايدى. كىمگە سەنىپ، كىمگە ارقا سۇيەۋىمىز كەرەك؟ ناعىز تەكسەرگىش بولسا، نەگە پەدوفيلدەردىڭ سانىن رەتتەپ، سولار تۋرالى اقپاراتتى نەگە جاريالامايدى؟ قانشاما ادامنىڭ ءومىرىن قور قىلادى عوي كەشەگى جاعداي. ۇكىمەت زورلانعاندارعا نە قولداۋ، نە قورعاۋعا جوق، تىم بولماسا جارتى الەمگە جار سالماسا بولماي ما؟" - دەپ جازعان زورلانعان قىزدىڭ اناسى.
زاڭگەر ءلاززات راقىشەۆا دا:
"راسىمەن، بىرەۋدىڭ جەكە دەرەگىن جەلىگە جاريالاپ، ەلگە تاراتۋ - ۇلكەن قىلمىس. كونستيتۋتسيادا ەلىمىزدىڭ باستى بايلىعى ادام جانە قۇقىقتارى دەپ ناقتى كورسەتىلگەن. وسى باستى بايلىقتى اياققا تاپتاپ، ەلدىڭ ومىرىنە قاتىستى قۇندى مالىمەتتى قاتىن وسەك رەتىندە تاراتقاندار قاتاڭ جازاعا تارتىلسىن. تالاپ ەتەمىز!", - دەپ جازدى.
