الماتى قالاسى مەدەۋ اۋدانىنىڭ تاۋ-سامال شاعىن اۋدانىندا تەحنوگەندىك سيپاتتاعى توپىراقتىڭ ىلعالدانۋىنان لاي كوشكىنى ءجۇردى. بۇل تۋرالى توتەنشە جاعدايلار مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
بەلگىلى بولعانداي، وقيعا تۋرالى اقپارات 8 اقپاندا ساعات 02.20-دا كەلىپ تۇسكەن.
مينيسترلىكتىڭ مالىمەتىنشە، سۋىق سۋمەن جابدىقتاۋ قۇبىرىنىڭ جارىلۋى سالدارىنان توپىراق ىلعالدانىپ، كەيىن كولەمى 3200 تەكشە مەتر بولاتىن لاي كوشكىنى جۇرگەن. ەكى جەكە تۇرعىن ۇيگە، ونىڭ ىشىندە بىرەۋىنە ءىشىنارا زاقىم كەلگەن.
الدىن الا اقپاراتقا سايكەس، ۇيلەردە ءتورت ادام، ونىڭ ىشىندە ەكى بالا بولعان.
كومەككە"قازسەلدەنقورعاۋ" مم، الماتى قالاسىنىڭ "109 قۇتقارۋ قىزمەتى" مم، رەسپۋبليكالىق جەدەل-قۇتقارۋ جاساعىنان، الماتى قالاسى تجد، تجم 28237 اسكەري بولىمىنەن، جەدەل مەديتسينالىق كومەك بريگاداسىنان، مەدەۋ اۋدانىنىڭ اكىمدىگىنەن 160-تان استام ادام جانە 30 تەحنيكا جۇمىلدىرىلدى.
سونداي-اق، جاقىن ماڭداعى ۇيلەردىڭ تۇرعىندارى ەۆاكۋاتسيالاندى. ولار № 47 مەكتەپكە ورنالاستىرىلدى. ولارعا تۇنەۋ ورنى، جىلى شاي جانە باسقا دا قاجەتتى كومەك كورسەتىلدى. جينالۋ پۋنكتىنە ورنالاستىرىلعاننان كەيىن بىرنەشە ساعات وتكەن سوڭ، تۇرعىندار ءوز ەركىمەن دوستارى مەن تۋىستارىنا كەتتى.
دارىگەرلەر بريگاداسى كەزەكشىلىكتى جالعاستىرۋدا. وقيعا ورنىندا توتەنشە جاعدايلار دەپارتامەنتىنىڭ پسيحولوگيالىق توبى جۇمىس ىستەپ جاتىر. ىقتيمال زارداپ شەككەندەردى ىزدەۋ جالعاسۋدا. ۇيلەردىڭ جاقىن ورنالاسۋى، تەحنيكانى پايدالانۋ مۇمكىندىگىنىڭ بولماۋى جۇمىستاردى قيىنداتىپ جاتىر.
سونىمەن قاتار وقيعا ورنىنا الماتى اكىمى ەربولات دوساەۆ تا باردى. توتەنشە جاعدايعا بايلانىستى ول 8 اقپانعا جوسپارلانعان تۇرعىندارمەن كەزدەسۋىن كەيىنگە قالدىردى. ال قۇتقارۋشىلارعا ىزدەۋ جۇمىستارىن توقتاتپاۋدى تاپسىردى.
“باستى مىندەت – ىزدەۋ-قۇتقارۋ جۇمىستارى. وسى ۇيدە تۇرعان ادامداردى ىزدەۋ بويىنشا موبيليزاتسيالىق توپتىڭ بارلىعى توقتاۋسىز جۇمىس ىستەۋى قاجەت”، – دەدى قالا باسشىسى.
