ازىربايجانداعى كەزەكتەن تىس پرەزيدەنت سايلاۋىندا بيۋللەتەندەردىڭ 93,35 پايىزى وڭدەلىپ، 92,05 پايىز داۋىسپەن يلحام اليەۆ كوش باستادى. بۇل تۋرالى ازەربايجان ورتالىق سايلاۋ كوميسسياسىنىڭ (وسك) توراعاسى مازاحير پاناحوۆ بريفينگ بارىسىندا مالىمدەدى، دەپ حابارلايدى “ادىرنا” ۇلتتىق پورتالى.
سونداي-اق، زاحيد ورۋدج – 2,19%، رازي نۋرۋللاەۆ – 0,8%، فازيل مۇستافا – 2%، ەلشاد مۇساەۆ – 0,67%، گۋدرات حاسانگۋليەۆ – 1,76%، فۋاد اليەۆ – 0,53% داۋىس جينادى.
ايتا كەتەيىك، امەريكالىق «Oracle Advisory Group» ۇيىمى ازاماتتاردىڭ ەڭبەك قۇقىقتارىن قورعاۋ ليگاسىمەن بىرلەسىپ جۇرگىزگەن ەكزيت-پولل قورىتىندىسى بويىنشا يلحام اليەۆكە سايلاۋشىلاردىڭ 93,9 پايىزى داۋىس بەرگەن.
«الەۋمەتتىك زەرتتەۋلەر ورتالىعى» جاۋاپكەرشىلىگى شەكتەۋلى سەرىكتەستىگىنىڭ مالىمەتىنشە، يلحام اليەۆكە سايلاۋشىلاردىڭ 92,4 پايىزى داۋىس بەرگەن.
«رەي» مونيتورينگ ورتالىعىنىڭ ەكزيت-پولل قورىتىندىسىنا سايكەس، يلحام اليەۆكە سايلاۋشىلاردىڭ 92,6 پايىزى داۋىس بەرگەن.
سايلاۋشىلار تىزىمىندە 6 ميلليون 478 مىڭ 623 ادام بار. رەسپۋبليكا بويىنشا 6537 سايلاۋ ۋچاسكەسى قۇرىلدى.
شەتەلدەگى ءازىربايجان ازاماتتارى ءۇشىن 37 ەلدىڭ ەلشىلىكتەرى مەن كونسۋلدىقتارىندا 49 سايلاۋ ۋچاسكەسى قۇرىلدى.
سايلاۋدى بايقاۋعا 90 مىڭنان استام بايقاۋشى تىركەلگەن.
تاۋەلسىز ءازىربايجان تاريحىندا العاش رەت سايلاۋ ەلدىڭ بۇكىل اۋماعىن، ونىڭ ىشىندە وككۋپاتسيادان ازات ەتىلگەن جەرلەردى قامتىدى. باسقىنشىلاردان ازات ەتىلگەن اۋماقتاردا 26 سايلاۋ ۋچاسكەسى قۇرىلدى.
