Qasym-Jomart Toqaev Qazaqstanda mindetti áleýmettik medıınalyq saqtandyrý júıesiniń iske qosylǵanyna bes jyl bolsa da, sol ýaqyttan beri bul salanyń bıýdjeti eki ese artsa da, medıınalyq kómektiń sapasy jaqsarmaǵanyn aıtty, dep habarlaıdy "Adyrna" ulttyq portaly.
"Taǵy bir mańyzdy mindet. Elimizdiń barlyq azamatyna birdeı jaǵdaı jasap, shyn máninde kómekke muqtaj adamdarǵa járdem berý – áleýmettik memlekettiń basty mindeti. Qazir memleket bıýdjetiniń jartysynan kóbi áleýmettik salaǵa bólinip jatyr. Sońǵy jyldary áleýmettik saladaǵy ınfraqurylymdy damytý úshin biraz jumys atqaryldy. Áleýmettik sala mamandarynyń, ásirese pedagogter men medıına qyzmetkerleriniń bedelin arttyrýǵa basa mán berildi. Endi azamattarǵa kórsetiletin qyzmettiń sapasyn jaqsartý qajet. Bul – eń aldymen, densaýlyq saqtaý salasyna qatysty másele", - dedi prezıdent.
Memleket basshysy óz sózinde mindetti áleýmettik medıınalyq saqtandyrý júıesiniń iske qosylǵanyna bes jyl bolǵanyn atap ótip, sol ýaqyttan beri sala bıýdjeti eki ese artqanyn tilge tıek etti.
"Bıyl 2,6 trıllıon teńge bólinedi. Alaıda medıınalyq kómektiń sapasy aıtarlyqtaı jaqsardy dep aıtýǵa bolmaıdy. Kóptegen qyzmet áli de qoljetimdi emes. Budan bólek kóp jaǵdaıda resýrstar tıimsiz jumsalady. Sonyń saldarynan bul salaǵa qosymsha qarjy bólip, bıýdjetke salmaq salýǵa týra keledi. Úkimet medıınalyq saqtandyrý júıesiniń qyzmetin qatań baqylaýǵa alýy kerek. Bul júıe qarapaıym ári túsinikti bolýǵa tıis", - dedi prezıdent.
