الماتىدا 2018 جىلى شىلدەدە كىسى قولىنان قازا تاپقان مانەرلەپ سىرعاناۋشى دەنيس تەنگە ارنالعان ەسكەرتكىش اشىلدى.
مۇسىندە سپورتشىنىڭ 2014 جىلى سوچيدەگى وليمپيادادا ونەر كورسەتۋ ءساتى بەينەلەنگەن. بۇل وليمپيادادا دەنيس تەن قولا جۇلدە ۇتىپ العان ەدى. ەسكەرتكىش قۇرمانعازى - بايسەيىتوۆا كوشەسى قيىلىسىنا ورناتىلعان. ونى سانكت-پەتەربۋرگ ءمۇسىنشىسى ماتۆەي ماكۋشكين جاساعان. دەنيس تەننىڭ ءمۇسىنى قولادان، تۇعىرى گرانيتتەن قالانعان. بيىكتىگى - 2,4 مەتر.
«ءبىز وكسانا الەكسەەۆناعا العىس ايتامىز، ويتكەنى ءاربىر دەتال، شتريحىنا دەيىن سونىڭ قاداعالاۋىندا بولدى»، - دەيدى الماتى اكىمىنىڭ ورىنباسارى ارمان قىرىقباەۆ.
اقپارات بويىنشا، الداعى ۋاقىتتا دەنيس تەننىڭ اناسىنىڭ سپورتشى ۇلى جايلى كىتابى دا باسىلىپ شىقپاق.
قازاقستاندىق مانەرلەپ سىرعاناۋشى، سوچي وليمپياداسىنىڭ قولا جۇلدەگەرى، ازيا ويىندارىنىڭ چەمپيونى دەنيس تەن بىلتىر 19 شىلدەدە الماتىدا اۋرۋحانادا قايتىس بولعان. كوشەدە تۇرعان اۆتوكولىگىنىڭ ايناسىن ۇرلاعانداردى توقتاتپاق بولعان سپورتشىنى ەكى ادام پىشاقتاپ كەتكەن. كەيىن بۇل وقيعا بويىنشا قۇدايبەرگەنوۆ، قياسوۆ جانە تولىباەۆا ۇستالعان.
17 قاڭتاردا الماتى قالالىق قىلمىستىق ىستەر جونىندەگى مامانداندىرىلعان اۋدانارالىق سوتى سپورتشى دەنيس تەننىڭ ولىمىنە بايلانىستى ايىپتالعان ارمان قۇدايبەرگەنوۆ پەن نۇرالى قياسوۆتى - 18 جىلعا، جانار تولىباەۆانى 4 جىلعا باس بوستاندىعىنان ايىرعان.
دەرەككوز: www.azattyq.org
"ادىرنا" ۇلتتىق پورتالى
