سادىر جاپاروۆتىڭ ايتۋىنشا، قىرعىزستاندا بۇيرەك ترانسپلانتاتسيالاۋ وپەراتسيالارى تەگىن جاسالادى، دەپ حابارلايدى “ادىرنا” ۇلتتىق پورتالى.
بۇل تۋرالى قىرعىز رەسپۋبليكاسىنىڭ پرەزيدەنتى سادىر جاپاروۆ «كابار» اگەنتتىگىنە بەرگەن سۇحباتىندا راستادى.
پرەزيدەنت مالىمەتىنشە، قازىر قىرعىزستاندا 2,5 مىڭنان استام ازامات گەمودياليز الادى، ونىڭ 50-ءى دونور تاۋىپ، تولىق مەديتسينالىق تەكسەرۋدەن ءوتىپ، ترانسپلانتاتسياعا دايىندالۋدا.
“العاشقى وپەراتسيا ءساتتى ءوتتى. ەكى مەديتسينالىق بريگادا كۇنىنە 2-3 وپەراتسيا جاساي الادى. قۇداي قالاسا، بۇدان بىلاي ءوزىمىز وتا جاسايتىن بولامىز. قۇنى 7-8 مىڭ دوللار تۇراتىن گەمودياليزگە تۇسەتىن ناۋقاستاردىڭ بۇيرەگىن اۋىستىرىپ سالۋدى مەملەكەت وتەيدى”، - دەدى پرەزيدەنت.
سادىر جاپاروۆ مەملەكەت وسىلايشا ەكى ەسە پايدا كورەتىنىن اتاپ ءوتتى. ءبىرىنشىسى – قىرعىزستان ازاماتتارىنا كومەك كورسەتۋ. ەكىنشىسى – شىعىنداردى ۇنەمدەۋ.
“مەملەكەت جىل سايىن گەمودياليز الاتىن ءاربىر پاتسيەنتكە 14-15 مىڭ دوللاردان جۇمسايدى. جىل سايىن 2,5 مىڭ ادامعا 3 ميللياردتان استام سوم بولىنەدى. ەگەر دونورلاردى تاپقان ناۋقاستارعا ءوزىمىز وپەراتسيا جاساساق، شىعىنداردى ازايتا الامىز. ناۋقاستىڭ ءوزى دونوردى تابادى، باستىسى گەنەتيكالىق ۇقساستىعى بولۋى.
جىل سايىن گەمودياليز الاتىن ءبىر پاتسيەنتكە جۇمسالاتىن قاراجاتتىڭ جارتىسىنا وپەراتسيا جاساي وتىرىپ، قالعان بولىگىن ۇنەمدەۋگە جانە كەلەسى جىلعا شىعىنداردى تولىعىمەن ازايتۋعا بولادى. ويتكەنى، ەگەر پاتسيەنت گەمودياليز الۋدى توقتاتسا، وندا مەملەكەت شىعىندارى دا ازايادى، - دەپ ءتۇسىندىردى مەملەكەت باسشىسى.
بۇعان دەيىن 2024 جىلدىڭ 1 اقپانىندا بىشكەكتە العاش رەت 22 جاستاعى ناۋقاسقا انا مەن بالانى قورعاۋ ۇلتتىق ورتالىعىندا بۇيرەك ترانسپلانتاتسياسى تەگىن جۇرگىزىلگەنى حابارلانعان بولاتىن.
“ادىرنا” ۇلتتىق پورتالى
