وتكەن جىلدىڭ قورىتىندىسىنا سايكەس ەل ەكونوميكاسى جاڭا جاعدايلارعا بەيىمدەلىپ، ورنىقتى دامۋ جولىنا ءتۇستى. قابىلدانعان شارالار ناتيجەسىندە ەكونوميكانىڭ ءوسىمى 5,1%-دى قۇرادى، دەپ حابارلايدى «ادىرنا» ءتىلشىسى ۇكىمەتتىڭ ءباسپاسوز قىزمەتىنە سىلتەمە جاساپ.
نەگىزگى سالالاردىڭ بارلىعى وڭ ديناميكا كورسەتتى: قۇرىلىستا – 13,3%، ساۋدادا – 11,3%، اقپارات جانە بايلانىس قىزمەتتەرى – 7,1%، كولىك قىزمەتى – 6,9%، ونەركاسىپ – 4,3%.
«نەگىزگى كاپيتالعا سالىنعان ينۆەستيتسيا 13,7%-عا ءوستى. بۇل رەتتە 2023 جىلدىڭ 9 ايىندا تىكەلەي شەتەلدىك ينۆەستيتسيا (تشي) كولەمى $19,7 ملرد-تى قۇرادى. ونىڭ ىشىندە $11 ملرد-تان استامى شيكىزاتتىق ەمەس سەكتورلارعا باعىتتالعان. جالپى 2 جىل قاتارىنان تشي كورسەتكىشتەرى سوڭعى ونجىلدىقتاعى ەڭ جوعارى كورسەتكىشتەردىڭ بىرىنە اينالدى – ولاردىڭ جىلدىق كولەمى $26-28 ملرد دەڭگەيىندە. قازاقستان تمد ەلدەرى اراسىندا شەتەلدىك ينۆەستيتسيالاردىڭ جالپى اعىنى بويىنشا كوش باستاپ تۇر،—دەلىنگەن حابارلامادا.
2023 جىلدىڭ 11 ايىندا سىرتقى ساۋدا اينالىمى 2,2%-عا ءوسىپ، $126 ملرد-تى قۇراعان.
«ۇكىمەت ۇلتتىق بانكپەن جانە جەرگىلىكتى اتقارۋشى ورگاندارمەن بىرلەسىپ ينفلياتسيانى باقىلاۋ جانە تومەندەتۋ جونىندەگى كەشەندى شارالاردى ىسكە اسىرۋدا. ناتيجەسىندە وتكەن جىلى ول 2 ەسەدەن استام تومەندەپ، 9,8%-دى قۇرادى. 2024 جىلى ينفلياتسيانى 6-8% دەڭگەيىندە ۇستاۋ مىندەتى قويىلدى.
2024 جىلدىڭ قورىتىندىسى بويىنشا ەكونوميكانىڭ ءوسۋى 5,3%-دان كەم بولماۋى ءتيىس»،—دەپ جازىلعان حابارلامادا.
