Pavlodar oblysyndaǵy “Maıqaıyńaltyn” kenishindegi opyrylǵan jerde qutqarýshylardyń ómirine qaýip tónip turǵany aıtyldy, dep habarlaıdy “Adyrna” ulttyq portaly QR Tótenshe jaǵdaılar mınıstrliginiń baspasóz qyzmetine silteme jasap.
Pavlodar oblysyndaǵy «Maıqaıyńaltyn» AQ aýmaǵyndaǵy opyrylǵan jerde ekskavatorlar topyraq pen taý jynystaryn qaıta qazý jumystaryn jalǵastyrýda. Ótken táýlikte soltústik betkeıdegi ekskavatorlar shamamen 25 tekshe metr kóleminde topyraqty qaıta qazdy.
Qazir aýmaqtaǵy opyrylǵan orynnyń barlyq perımetri boıynsha jaryqtar paıda bolǵan. Mamandardyń sózinshe, bul óte qaýipti jaǵdaı.
“Buryn kishirek jaryqtar paıda bolǵan kezde, qulaýlar oryn alǵan. Sonymen qatar, topyraqty magnıtometr men geoskanermen zerttegen kezde mamandar bul nysannyń ornalasqan jerinde buzylý yqtımaldyǵy joǵary degen qorytyndyǵa keldi. Jumysty nólden tómen temperatýra men kúshti qarly boran da qıyndatady. Munyń barlyǵy qutqarýshylardyń ómirine qaýip tóndiredi”, - dep habarlady Tótenshe jaǵdaılar mınıstrligi.
Osyǵan baılanysty izdestirý-qutqarý jumystarynyń bir bóligi nemese tolyqtaı toqtatylýy múmkin ekeni aıtyldy.
“Avarııalyq-qutqarý jáne kezek kúttirmeıtin jumystardy júrgizý múmkin bolmaǵan jaǵdaıda, tótenshe jaǵdaıdy joıý basshysy birinshi kezekte tótenshe jaǵdaı aımaǵyndaǵy adamdardy qutqarý boıynsha barlyq múmkin sharalardy qabyldaı otyryp, atalǵan jumystardy tolyqtaı nemese olardyń bir bóligin toqtata turý týraly sheshim qabyldaýǵa quqyly. Bul másele qaralýda”, - dep tolyqtyrdy TJM.
“Adyrna” ulttyq portaly
