جۋرناليست اسلان قاجەنوۆكە استانادا كۇرەس تۇرلەرىنەن ءوتىپ جاتقان قازاقستان بىرىنشىلىگىنەن حابار تاراتۋعا كەدەرگى كەلتىرىلگەن. بۇل تۋرالى باق وكىلىنىڭ ءوزى Facebook جەلىسىندەگى پاراقشاسىندا ايتتى، دەپ حابارلايدى «ادىرنا» ءتىلشىسى.
«قازىر استانادا كۇرەس تۇرلەرىنەن قازاقستان چەمپيوناتى ءوتىپ جاتىر. ول باستالماي تۇرىپ، ۇلكەن داۋ بۇرق ەتتى. ىشكى بىرىنشىلىككە لەگيونەرلەر قاپتاي باستادى. تاعى دا كەلىپ قوسىلادى دەگەن سىبىستار بار. فەدەراتسيا تاراپىنان رەسمي تۇسىندىرمە بولمادى. الەۋمەتتىك جەلىدەگى قىزۋ پىكىرتالاسقا نۇكتە قويىلمادى. ءالى كۇنگە دەيىن نە بولىپ جاتقانىن بىلمەيمىز. كىمنەن سۇرايمىز؟ نەگە كەلىمسەكتەر كوبەيدى؟ تۇپكى ماقسات قانداي؟
ەندى بۇگىن سول كەلىمسەكتەردى ءوز كوزىممەن كورەيىن دەپ جەكپە-جەك سارايىنا ارنايى باردىم. فينال الدىنداعى بىرەر ساعاتتىق ءۇزىلىس ەكەن. وسى فوتوعا ءتۇسىپ ۇلگەرگەنىم جوق، باسى-قاسىندا جۇرگەندەر قۋىپ شىقتى. تۋرا ماعىناسىندا قۋىپ شىقتى. قاسىمداعى ارىپتەسىم سول ءساتتى تەلەفونعا تۇسىرگىسى كەلگەن ەدى. ونىڭ ۇيالى قۇرىلعىسىن تارتىپ الدى. ىشىندەگى ۆيدەونى تازالادى. نە ماسقارا مىناۋ؟ نە ارەكەت بۇل؟
جابايى ەمەسپىز، قىلمىسكەر ەمەسپىز. ءسوزدىڭ رەتىن دە تۇسىنەمىز. قازاقستان چەمپيوناتىنان حابار تاراتا الماساق، نەسىنە قازاق ءجۋرناليستى بولىپ ءجۇرمىز؟ نەبىر قۇرلىقتىق جانە الەمدىك الامانداردىڭ ورتاسىندا بولدىم. بۇكىل جەردە ەتيكا بار. ءوتىنىش، جىگىتتەرگە ايتىپ قويىڭىز، اشۋلارىن ءبىر جەرلەرىنە تىعىپ قويسىن. ارى-بەرى يتەرمەلەپ، تەلەفونىمىزدى تارتىپ الاتىنداي لوح ەمەسپىز. ايتپاقشى، الگى ۆيدەو وشىرىلگەن جوق. زاماناۋي تەلەفونداردىڭ سونداي قاسيەتى بار. ونى دا ەسكەرتىڭىز»،—دەدى ول.
سپورت ءجۋرناليسى ءماجىلىس دەپۋتاتى داۋلەت تۇرلىحانوۆتان ۇلكەن ءۇمىت كۇتكەنىن جەتكىزدى.
«ودان كەيىن كەشە ماجىلىستە سپورتقا قاتىستى زاڭ جوباسى تالقىلاندى. اشىعىن ايتايىن، سىزدەن (داۋلەت تۇرلىحانوۆ — رەد.) ۇلكەن ءۇمىت كۇتتىم. ويتكەنى، باسقا-باسقا، وتاندىق سپورتتىڭ بىلىعى مەن شىلىعىن بەتىنە شىعارىپ، رەتتەۋدى ۇسىنا الاتىن ساناۋلى ادامداردىڭ ءبىرىسىز. مالىمدەمەڭىزدەن كەيىن الگى ءۇمىت سۋ سەپكەندەي باسىلدى. بۋكمەكەرلىك كومپانياعا قاتىستى «نە وت حوروشەي جيزني» دەگەن پىكىر ءبىلدىردىڭىز. قارجىنىڭ تاپشىلىعىمەن ءتۇسىندىردىڭىز. كۇرەس فەدەراتسياسىنا بىلتىردىڭ وزىندە مەملەكەتتەن 150 ميلليون تەڭگەدەن اسا قارجى بولىنگەن. ونى قايدا جۇمسادىڭىز؟ ەسەبىن كىم بەرەدى؟ ونىڭ ءوزى جەتكىلىكسىز بە؟ اشىق ايتساڭىزشى. ال، ەندى جەتكىلىكتى بولسا، وندا نەگە فەدەراتسيا وليمپبەت-پەن كەلىمشارت جاساستى؟
بۇل ەندى ءوزىڭىزدىڭ قۇزىرەتىڭىزگە كىرەتىن، شەشىلۋى قولىڭىزدان كەلەتىن نەگىزگى ماسەلەلەر. ودان بولەك، سپورتشىلاردىڭ، باپكەرلەردىڭ جانە كۇرەس اينالاسىندا جۇرگەن مامانداردىڭ تۇيىتكىلدەرى جەتەدى. ونى دا ءجيى ەستيمىز. ۇلتتىق قۇرامانىڭ دايىندىعى جانە كۇرەستىڭ دامۋ جۇيەسىنە قاتىستى دا سۇراق كوپ. ءبىراز ادام «داۋلەت اعا ازامات قوي، قازاقتىڭ باتىرى عوي، وعان تيىسپەي-اق قويشى» - دەپ حابارلاسادى. مەن ءسىزدىڭ جەكە باسىڭىزدا ەشقانداي شارۋام جوق. كەزىندە ەل نامىسىن قورعاپ، ابىرويىمىزدى اسقاقتاتقانىڭىزدى باعالايمىن. بىراق، ەندى وتاندىق كۇرەستى سۇراۋعا قاقىمىز بار شىعار؟ ىشكى بىرىنشىلىككە ەمىن-ەركىن كىرىپ، نەگە قالىڭ قازاق جانكۇيەرىنە اقپارات تاراتا المايمىز؟ تۇسىنەمىن، ءتارتىپ بار. بولۋى دا كەرەك. بىراق، شاش ال دەسە، باس الۋدى قاشان قويامىز؟ وتاندىق سپورتتى، ونىڭ ىشىندە، وتاندىق كۇرەستى قالاي دامىتامىز؟ قالاي ءبىر جولعا قويامىز؟ ناقتى جوسپار مەن ستراتەگيا بار ما؟ الدە، تەك لەگيونەرلەرگە سەنەمىز بە؟ داۋلەت مىرزا نە دەيسىز؟ جالپى نە ىستەپ ءجۇرسىز؟!»—دەدى اسلان قاجەنوۆ.
