بولاشاقتا قازاقستاندىقتار مەملەكەتتىك قىزمەتتەردى ChatGPT فورماتىندا بايلانىس جاساۋ ارقىلى الا الادى. بۇل تۋرالى Digital Almaty 2024 تسيفرلىق فورۋمىندا تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ايتتى، دەپ حابارلايدى “ادىرنا” ۇلتتىق پورتالى.
"بۇۇ رەيتينگى بويىنشا قازاقستان قازىردىڭ وزىندە ونلاين قىزمەت كورسەتۋ بويىنشا الەمدە 8-ءشى ورىندا، ال جالپى ەلەكتروندى ۇكىمەتتى دامىتۋ بويىنشا 28-ورىندا تۇر", - دەپ اتاپ ءوتتى ول.
ونىڭ ايتۋىنشا، بۇگىنگى تاڭدا مەملەكەتتىك قىزمەتتەردىڭ 93 پايىزعا جۋىعى ەلەكتروندى تۇردە كورسەتىلەدى، 50 ميلليون انىقتاما مۇلدەم الىنىپ تاستالدى.
"ويتكەنى ءبىز اقپاراتتىق جۇيەلەردى ينتەگراتسيالاپ، مەملەكەتتىك قۇرىلىمدار مەن ۇيىمدارعا انىقتاما تالاپ ەتۋگە تىيىم سالدىق", - دەدى باعدات مۋسين.
ول بيىل e-Gov ونىمدەرىنە جاساندى ينتەللەكت ەنگىزۋگە نازار اۋدارىلا باستاعانىن اتاپ ءوتتى.
باعدات مۋسين قازاقستاندىقتار جاقىن ارادا مەملەكەتتىك قىزمەتتەردى ChatGPT فورماتىنداعى بايلانىس ارقىلى الادى دەپ ەسەپتەيدى.
"قازىرگى ازىرلەمە قازاق تىلىنە اۋدارىلادى، ءبىز قازاق ءتىلدى LLM قۇرۋ بويىنشا جۇمىس ىستەپ جاتىرمىز", - دەدى ول.
نازارباەۆ ۋنيۆەرسيتەتىمەن بىرلەسە وتىرىپ، قازاقستاندىق ازىرلەمە بازاسىندا GPT چاتىنىڭ بالاماسىن جاساۋ جۇمىسى باستالعان.
"بۇل باسقا ءونىمدى پايدالانۋ نەمەسە قايتا پايدالانۋ ەمەس، قازاقستان جاساندى ينتەللەكتكە ءوزىنىڭ تسيفرلىق ونىمىمەن ەنۋدى ماقسات تۇتىپ وتىر", - دەپ تۇيىندەدى باعدات مۋسين.
ايتا كەتەيىك، الماتىدا Digital Almaty 2024 تسيفرلىق فورۋمى ءوتىپ جاتىر. فورۋمدا 200-دەن استام سپيكەر ءسوز سويلەيدى. ءۇش كۇنگە سوزىلاتىن تسيفرلىق ءىس-شاراعا 30 مىڭنان استام ادام كەلەدى دەپ جوسپارلانىپ وتىر
