توقاەۆ تاسماعامبەتوۆتى الدىرا ما؟

2273
Adyrna.kz Telegram

"كۇركىرەپ كۇندەي ءوتتى ءبىر سوعىس" دەپ قاسىم اقىن ايتقانداي سايلاۋدىڭ دا شۋى مەن دۋى باسىلدى. قازىرگى "تازارعان" ساياسات الاڭىندا ەلدە قاسىم-جومارت توقاەۆتان اسقان ساياساتكەر جوق. ونىڭ باستى قارسىلاسى بولعان ءامىرجان قوسانوۆتىڭ سايلاۋ قورىتىندىسى شىعار-شىقپاستان قۇتتىقتاپ، مويىنداعانى دا سونىڭ دالەلى. اناۋ بىلاي بولعاندا، مىناۋ بىلاي بولعاندا دەگەن اڭگىمەنىڭ بارلىعى ەندى بوس ءسوز بولىپ قالا بەرمەك.

بىراق، ءبىز ءبىر ساياساتكەردى قاپەردەن تىس قالدىردىق. ول، قازاقستاننىڭ رەسەيدەگى توتەنشە جانە وكىلەتتى ەلشىسى يمانعالي تاسماعامبەتوۆ. قازاقستانداعى سوڭعى "ويىندار" ۋاقىتىندا تاسماعامبەتوۆتىڭ ويىننان تىس قالعانىن ەسكەرسەك، يمانعاليدىڭ  ساياسي سالماعى ارتپاسا تومەندەگەن جوق. ەندىگى سۇراق، كەزىندە ەلباسى نازارباەۆ "شەكارا اسىرعان" تاسماعامبەتوۆتى قازىرگى پرەزيدەنت توقاەۆ قازاقستانعا الدىرا ما؟

سايلاۋدان كەيىن ءۇش كۇن بويى ەلىمىزدىڭ باستى قالالارىندا حالىقتىڭ سايلاۋعا، جۇيەگە دەگەن نارازىلىق ميتينگىلەرىن ەسكەرسە، قاسىم-جومارت كەمەلۇلى يمانعالي نۇرعاليۇلىن الدىرادى. الداعى كۇزدە وتەتىن پارلامەنت سايلاۋىندا بيلىكتىڭ پارتياسىن كاتەپتى قارا نارداي سۇيرەيتىن تۇلعا ول- تاسماعامبەتوۆ. ەل ىشىندە سۇيكىمى بار يمانعاليدىڭ جۋرناليستەر مەن زيالى قاۋىم الدىندا دا بەت-بەدەلى بار. بيلىكتىڭ وليگارحتىق كلاندارى دا "تاستان" اياعىن تارتىپ جۇرەدى. قىزۋ قاندى بۇكىل باتىستىڭ يمانعاليدى قالاي حان كوتەرەتىنىن ەسكەرسەك، جانە ءدال قازىر كادرلىق داعدارىستاعى بيلىكتىڭ جاعدايىن باعامداساق تاسماعامبەتوۆتى ماسكەۋدەن نۇر-سۇلتانعا اۋىستىرۋ ءتيىمدى شەشىم بولماق.

ال، ەندى كەزىندەگى بيلىكتىڭ ءوزى قاۋىپتەنگەن تاسماعامبەتوۆتىڭ قازاقستانعا ورالۋى قازىرگى بيلىك ءۇشىن "اشىق مينانى" ءوز ەركىمەن الدىرعانمەن بىردەي. ليدەر كۇتىپ وتىرعان حالىق ءۇشىن يمانعاليدىڭ ورالۋى، حالىقتىڭ "كوكتەن سۇراعانىن جەردەن بەرگەنمەن" تەڭ جاعدايدا. كانىگى ساياساتكەر نۇرعاليۇلى دا بۇنى ءبىلىپ وتىر. جوعارىدا ايتقانىمىزداي جۋرناليستەر مەن زيالى قاۋىمنىڭ قولداۋىنان بولەك، حالىقتىڭ دا سۇيىسپەنشىلىگىن ەسكەرسەك، بۇل "شاحمات ءجۇرىسى" بيلىك ءۇشىن وتە قاۋىپتى قادام.

ال، تاسماعامبەتوۆتىڭ ءوز ويى قانداي ەكەنى بەلگىسىز. ەگەر، امبيتسياسىن اقىلىنا جەڭدىرسە، بارىنەن تىس قالعانى دۇرىس. بارلىق "ويىننان". قازىر قازاقستان ساياساتىندا "قاراڭعى بولمەدەن قارا مىسىق ويناۋ" ويىنى ءوتىپ جاتىر. حالىققا بەدەلى بار تۇلعالار ساياساتتىڭ "باتپاعىنا باتىرىلىپ", اعاش اتقا مىنگىزىلۋدە. تاسماعامبەتوۆتى جوق دەگەندە دەپۋتات رەتىندە الدىرعان كۇننىڭ وزىندە اياعى قالاي بولارىن ءوزى دە سەزىپ وتىر. كەزىندە سول كەزدەگى استانا قالاسىنىڭ اكىمى بولعان نۇرعاليۇلى جۋرناليستەر الدىندا "قانداي جاعدايدا بولماسىن دەپۋتات بولمايتىنىن" مالىمدەگەن بولاتىن.

سوڭعى ءسوز تاسماعامبەتوۆتەن. "ۋاقىت -تورەشى".

وڭعار قابدەن

"ادىرنا ۇلتتىق پورتالى

 

 

پىكىرلەر