ءماجىلىس سپيكەرى، «AMANAT» توراعاسى ەرلان قوشانوۆ بۇگىن پارتيانىڭ رەسپۋبليكالىق قوعامدىق قابىلداۋ الاڭىندا ازاماتتاردى قابىلدادى.
ازاماتتار پارتيا توراعاسىنا ەرەكشە قاجەتتىلىگى بار بالالاردى قولداۋ، مەديتسينالىق پۋنكتتەر سالۋ جانە زاڭناماعا تۇزەتۋلەر ەنگىزۋ سىندى بىرقاتار ماسەلەمەن جۇگىندى.
استانا قالاسىنىڭ تۇرعىنى، ەكى بالانىڭ اناسى ماركەن نۇرلانوۆا ەرەكشە قاجەتتىلىگى بار بالالارعا ارنالعان قىزمەتتەردى جەتىلدىرۋ ماسەلەسىن قوزعادى. ونىڭ ايتۋىنشا، ارنايى بالاباقشالاردىڭ قىزمەت اقىسى ايىنا 250 مىڭ تەڭگەدەن 800 مىڭ تەڭگەگە دەيىن وزگەرىپ وتىرادى.
«بالالارعا ارنالعان جەكە ينكليۋزيۆتى ينفراقۇرىلىم باعاسى وتە قىمبات. سالادا بىلىكتى ماماندار تاپشى، ەرەكشە بالالارعا ارنالعان دامىتۋ ورتالىقتارىندا ليتسەنزيا جوق، نارىقتا تيىمدىلىگى دالەلدەنبەگەن قوسىمشا دامىتۋ قىزمەتتەرى كورسەتىلەدى. سونىمەن قاتار، دياگنوستيكالىق پروتسەدۋرالار كەزەگى ءۇش ايعا سوزىلادى، ال دەنساۋلىق ساقتاۋ مينيسترلىگى نەمەسە وقۋ-اعارتۋ مينيسترلىگى تاراپىنان باقىلاۋ جۇرگىزىلمەيدى»، – دەدى ول.
ەرلان قوشانوۆ ەرەكشە قاجەتتىلىگى بار بالالاردى جان-جاقتى قولداۋ ماسەلەسىنە «AMANAT» پارتياسى ءاردايىم ءجىتى نازار اۋداراتىنىن اتاپ ءوتتى. ماسەلەن، بىلتىر پارتيانىڭ «حالىقپەن بىرگە!» سايلاۋالدى باعدارلاماسىن جۇزەگە اسىرۋ اياسىندا 8 ەرتە ارالاسۋ ورتالىعى اشىلدى. بۇل ورتالىقتاردا دامۋى كەشەۋىلدەگەن نەمەسە ونىڭ پايدا بولۋ قاۋپى بار جاس بالالارعا ءتيىستى كومەك كورسەتۋ كوزدەلەدى. سونداي-اق مەكتەپ قابىرعالارىندا 61 ينكليۋزيا سىنىبى اشىلدى. پارتيا توراعاسى ماركەن نۇرلانوۆانىڭ سىن-ەسكەرتپەسى پارتيانىڭ ەرەكشە بالالارعا بارىنشا قولايلى جاعداي جاساۋ باعىتىندا جاساپ جاتقان جۇمىسىندا، زاڭ شىعارۋ ىسىندە جانە وزگە دە قىزمەتىندە ەسكەرىلەتىنىن ايتتى.
ەكىباستۇز قالاسىنىڭ قۇرمەتتى ازاماتى، جۋرناليست جۇماعالي قوعاباي اكادەميك قانىش ساتباەۆ تۋرالى ەستەلىكتەر جيناعىن شىعارۋدى ۇسىندى. گەولوگ-عالىمنىڭ تۋعانىنا بيىل 125 جىل تولىپ وتىر. مەرەيتوي پرەزيدەنت تاپسىرماسىنا سايكەس اتاپ وتىلەدى. جۋرناليست بۇل تاقىرىپتى بۇرىننان بەرى زەرتتەپ-زەردەلەپ ءجۇر. ونىڭ جەكە مۇراعاتىندا ايگىلى عالىم تۋرالى بۇرىن-سوڭدى جاريالانباعان مالىمەتتەر دە ساقتاۋلى تۇر.
«مەملەكەت باسشىسى قاسىم-جومارت توقاەۆ «Egemen Qazaqstan» گازەتىنە بەرگەن سۇحباتىندا ەل تاريحىندا ەرەكشە ورنى بار تۇلعالارعا قۇرمەت كورسەتۋ ءدəستۇرى حالقىمىزدىڭ جالپىۇلتتىق بىرەگەيلىگىن نىعايتاتىنىن اتاپ ءوتتى. سوندىقتان پارتيا كورنەكتى عالىم، قوعام قايراتكەرى قانىش ساتباەۆتىڭ ءومىر جولىنداعى بەيمالىم تۇستارىن جان-جاقتى اشىپ كورسەتەتىن جيناقتى شىعارۋعا قولداۋ كورسەتىپ، «كىتاپ-AMANAT» پارتيالىق جوباسىنىڭ ەل اۋماعىنداعى كىتاپ ورتالىقتارىندا جيناقتىڭ تۇساۋكەسەرىن وتكىزەدى»، – دەدى ەرلان قوشانوۆ.
اقتوبە تۇرعىنى رۋسلان قازىباەۆ سپورت سەكتسيالارىندا ەرەكشە ءبىلىم بەرۋ قاجەتتىلىكتەرى بار بالالارعا ارنالعان ۆاۋچەرلەر مەن جەكە كەزەك ەنگىزۋدى ۇسىندى. پاۆلودار وبلىسى شىلىكتى اۋىلىنىڭ تۇرعىنى امانجول راحىمجانوۆ مەديتسينالىق پۋنكت سالىپ بەرۋدى ءوتىندى. ال جامبىل وبلىسى ءتاتتى اۋىلىنان كەلگەن زەينەتكەر كۇلاش ۋتيروۆا تۇتىنۋشىلىق نەسيەنى رەسىمدەۋ كەزىندە ستۋدەنتتەرگە قويىلاتىن تالاپتاردى قاتاڭداتۋدى ۇسىندى.
قوعام قايراتكەرى گۇلنارا احمولدينا «قولجەتىمدى قازاقستان» جوباسىن، ياعني مۇگەدەكتىگى بار ادامدار ءۇشىن اۋەجايلاردىڭ، ۆوكزالداردىڭ، اۋرۋحانالاردىڭ، سپورت كەشەندەرىنىڭ جانە وزگە دە الەۋمەتتىك نىسانداردىڭ قولجەتىمدىلىگى تۋرالى اقپاراتتى الۋعا بولاتىن ۆيرتۋالدى كارتانى قولداۋدى سۇرادى.
ەرلان قوشانوۆ قارالعان بارلىق ءوتىنىش بويىنشا پارتيا فيليالدارىنا ناقتى تاپسىرما بەرىپ، ونىڭ شەشىمىن قاداعالاۋدى جەكە باقىلاۋىنا الدى.
