كەزىندە وپپوزيتسيالىق ساياساتكەر رەتىندە قاتار جۇرگەن كاسىپكەرلەر تولەن توقتاسىنوۆ پەن عالىمجان جاقيانوۆتىڭ اراسىنداعى داۋ-داماي ءالى جالعاسىپ كەلەدى.
16 قاڭتار كۇنى مەدەۋ اۋداندىق سوتىندا وتكەن عالىمجان جاقيانوۆتىڭ تولەن توقتاسىنوۆ پەن ونىڭ جۇبايى الما توقتاسىنوۆانىڭ ۇستىنەن تۇسىرگەن تالاپ-ارىزىنىڭ قورىتىندى سوتى وتكەن بولاتىن. «ادىرنا» ۇلتتىق پورتالى سوت بارىسىنا قاتىسىپ، سوت ناتيجەسى تولەن توقتاسىنوۆتىڭ پايداسىنا شەشىلگەنىن حابارلاعان ەدى. دەگەنمەن، پاۆلودار وبلىسىنىڭ ەكس-اكىمى عالىمجان جاقيانوۆ دوسى مەن ونىڭ جۇبايىن جايىنا قالدىرار ەمەس. نەلىكتەن؟
اقشا ءۇشىن تارتىس
بۇرىن-سوڭدى اراسىن اقشا بولگەن ەسكى ەكى دوس اراسىنداعى داۋدىڭ قالاي باستالعانىن جازعان ەدىك. قىسقاشا ايتساق، 2000 جىلداردا حالىقتىڭ ءسوزىن سويلەپ، مۇڭىن مۇڭداعان، 30 جىل ايىرىلماستاي دوس بولعان ساياساتكەرلەر عالىمجان جاقيانوۆ پەن تولەن توقتاسىنوۆتىڭ اراسىن «قارا مىسىق» كەسىپ ءوتتى.
2019 جىلى 30 تامىزدا جاقيانوۆ پەن توقتاسىنوۆ اراسىندا موڭعولياداعى ALGT كومپانياسىنىڭ 37,5 پايىز كولەمىندەگى ۇلەسىن ساتۋ-ساتىپ الۋ تۋرالى حاتتامالىق كەلىسىم راسىمدەلگەن. حاتتامالىق كەلىسىم شارتتارىنا سايكەس، تاراپتاردىڭ ۇلەس قۇنى 1 765 000 ء(بىر ميلليون جەتى ءجۇز الپىس بەس مىڭ) اقش دوللارىنا باعالاندى. توقتاسىنوۆ كومپانيانى باسقارۋدى جاقيانوۆقا بەرگەن، كەيىن جاقيانوۆ كەلىسىلگەن اقشانىڭ قالعان بولىگىن تولەۋدى دوعارىپ، توقتاسىنوۆتى «الاياق» دەپ ايىپتاپ، ۇستىنەن ارىز تۇسىرگەن.
وسىلايشا، ەكى جىلعا سوزىلعان داۋدان كەيىن مەدەۋ اۋداندىق سوتى جاقيانوۆتىڭ ارىزىن قاناعاتتاندىرمادى.
ودان بولەك، بىلتىر جاقيانوۆ الما توقتاسىنوۆانىڭ الەۋمەتتىك جەلىدەگى جازعان جازبالارىنا بايلانىستى «ار-نامىسىمدى تاپتادى» دەگەن جەلەۋمەن 2 000 000 تەڭگەگە جۋىق اقشا تالاپ ەتكەن بولاتىن. ەكى ايعا سوزىلعان بۇل سوتتىڭ قورىتىندىسى دا توقتاسىنوۆانىڭ پايداسىنا شەشىلگەن ەدى. الايدا جاقيانوۆ سوت ناتيجەسىنە قاناعاتتانباي، اپەللياتسياعا بەرگەن.
«ەكىسوزدىلىك بەرەكە اكەلمەيدى»
الما توقتاسىنوۆانىڭ ايتۋىنشا، جاقيانوۆتىڭ قورعاۋشىسى 16 قاڭتار كۇنى وتكەن سوتتىڭ ناتيجەسىن دە اپەللياتسياعا بەرەتىندىكتەرىن ايتقان.
«بۇل ادەتتەگى ازاماتتىق ءىس سياقتى. بىراق بۇل جەردە پروتسەستىڭ قىزىقتى تۇسى - تانىمال ادامدار اراسىندا بولىپ وتىر. جاقيانوۆ ءوزىن وپپوزيتسيانىڭ كوشباسشىسى سانايدى. ءسوز بوستاندىعى، ادىلدىك، جاريالىلىق تۋرالى ۇنەمى سۇحباتتار بەرەدى... الايدا، سوتتا ءوزى بۇل ۇعىمدارعا قارسى شىعىپ، مۇلدە توبە كورسەتپەدى. ءتىپتى، سوتتىڭ اشىق وتۋىنە، جۋرناليستەردىڭ قاتىسۋىنا قارسى شىقتى. ونىڭ ورنىنا جوعارعى سوتتىڭ بۇرىنعى سۋدياسى، قازىر ادۆوكات تاگير سيسيمباەۆ وتىردى.
جاقيانوۆ پروكۋروردىڭ قاۋلىسىمەن انىقتالعان انىق فاكتىلەردى دە جوققا شىعاردى. ءسويتىپ، تولەندى الداعانى ءۇشىن ونىمەن كەلىسىم شارتقا قول قويعانىن ايتتى. بىراق سوتتا عالىمجاننىڭ تولەننىڭ ۇلەسكەر ەكەنىن ءوزى راستاعان العاشقى حاتتارى كورسەتىلدى. عالىمجان بۇل حاتتاردى جوعالتىپ العانىن مالىمدەدى. دەگەنمەن، حاتتار جوعالمايدى، ولار تەك جويىلادى. سوندىقتان توقتاسىنوۆ جاقيانوۆتان فاكتىنى جوققا شىعاراتىن ادەتىن بىلە تۇرا، بۇل حاتتاردى نوتاريالدى كۋالاندىرعان. سوتتا كۋاگەر جاقيانوۆتىڭ لينكيديندەگى پاراقشاسىن وقىدى، وندا ول ءوزى «ALGT» كومپانياسىنىڭ تەڭ يەسى ەكەنىن جازادى. بىراق سوتتا ول بۇل كومپانياعا ەشقانداي قاتىسى جوق دەپ وتىرىك ايتقان. سوت پروتسەسى اياقتالعانىنا ءبىر مينۋتتان كەيىن بۇل بەت Linkidin-نەن جوعالىپ كەتتى. عالىمجان تاعى دا وشىرگەن بولۋى مۇمكىن.
ودان بولەك، عالىمجان موڭعوليا پوليتسياسىنا تولەندى العاش 2008 جىلى تانىعانىن ايتقان. ال جاقيانوۆتىڭ قورعاۋشىسى 2005 جىلى نازارباەۆتىڭ اتىنا كەشىرىم جاساۋ تۋرالى ءوتىنىش جازباعانىن مالىمدەدى. دەگەنمەن، حالىق ەكەۋىن 2000 جىلداردان بەرى بىلەدى. جاقيانوۆتىڭ ءسوزى مەن ءىسى ساي كەلمەيدى. ەكىسوزدىلىك بەرەكە اكەلمەيدى»، - دەدى الما توقتاسىنوۆا «ادىرنا» ۇلتتىق پورتالىنا بەرگەن سۇحباتىندا.
«جاقيانوۆ وتىرىك ايتۋدان ۇيالا ما؟»
سونىمەن قاتار، الما توقتاسىنوۆا اقشا ءۇشىن ەمەس، وتاعاسىنىڭ ابىرويى ءۇشىن سوڭىنا دەيىن كۇرەسەتىنىن جەتكىزدى.
«بۇل سوت اقشاعا قاتىستى داۋ بولىپ كورىنەدى. بىراق اقشا تۇككە دە تۇرمايدى. مەن تولەننىڭ اتىنا جاعىلعان ايىپ پەن ونىڭ ابىرويى ءۇشىن، بالالارىمىزدىڭ بولاشاعى ءۇشىن سوڭىنا دەيىن كۇرەسەمىن.
عالىمجان تولەنمەن سوتتاسسا دا، «ادىرنا» ۇسىنعان سۇحباتتان قاشادى. سوندا تولەننىڭ كوزىنە قاراپ، وتىرىك ايتۋعا ۇيالا ما؟ تولەن ونىمەن اشىق سۇحباتتاسۋعا قارسى ەمەس، ونى تالاي ايتتى. بىراق جاقيانوۆ تاراپ ونى دا، مەنى دە، ءتىپتى باق وكىلدەرىن دە جايىنا قالدىرار ەمەس»، - دەدى توقتاسىنوۆا.
ايتا كەتەيىك، 2023 جىلى قاڭتار ايىندا تولەن توقتاسىنوۆتىڭ «ادىرنانىڭ» يۋتۋب ارناسىنا بەرگەن سۇحباتىنان كەيىن، “ادىرنا” ۇلتتىق پورتالى عالىمجان جاقيانوۆقا دا الاڭ ۇسىنىپ، سۇحبات بەرۋىن سۇراعان بولاتىن. الايدا ول وعان وڭ جاۋابىن بەرمەي، "ادىرنا" پورتالىنىڭ ۇستىنەن ارىز تاستاپ ۇلگەردى. ءىس الاتاۋ اۋداندىق سوتىندا قارالۋدا. كەزەكتى سوت وتىرىسى 25 قاڭتاردا وتەدى.
دانا نۇرمۇحانبەت
«ادىرنا» ۇلتتىق پورتالى
