پرەزيدەنتتىڭ كومەكشىسى سارايشىق قالاشىعىنداعى ارحەولوگيالىق جۇمىستارمەن تانىستى، دەپ حابارلايدى "ادىرنا" ءتىلشىسى.
قازاقستان پرەزيدەنتىنىڭ كومەكشىسى رۋسلان جەلدىباي قازاق حاندىعى زامانىندا اسا ماڭىزدى بولعان قالالاردىڭ ءبىرى سارايشىققا ساپار شەككەن. بۇل تۋرالى ءوزىنىڭ Facebook پاراقشاسىندا جازدى.
جوشى ۇلىسىندا استانا مارتەبەسىن الىپ، قازاق حاندىعىنىڭ العاشقى حاندارىنىڭ ورداسى بولعان سارايشىققا ارنايى بارىپ، تاريحي ورىندا جۇرگىزىلىپ جاتقان ارحەولوگيالىق جۇمىستارمەن تانىستىم. بيىل ۇلتتىق قۇرىلتايدى ۇيىمداستىرۋ اياسىندا ايماقتا اۋقىمدى شارالار اتقارىلادى، - دەدى رۋسلان جەلدىباي.
پرەزيدەنت كومەكشىسى ءوز جازباسىندا تاريحي جادتى جاڭعىرتۋعا دا توقتالىپ ءوتتى.
ەلىمىزدە 2019 جىلدان بەرى تاريحي جادىمىزدى جاڭعىرتۋ باعىتىندا ۇلكەن شارالار جۇرگىزىلىپ جاتقانىن بىلەسىزدەر. پرەزيدەنتتىڭ باستاماسىمەن وسىدان ءۇش جىل بۇرىن التىن وردانىڭ 750-جىلدىعى تويلاندى. بيىل جوشى ۇلىسىنىڭ 800-جىلدىعىن اتاپ وتەمىز. مۇنىڭ ءبارى - ۇلىق ۇلىستىڭ تاريحي مۇراگەرى رەتىندە مەملەكەتتىگىمىزدىڭ تاريحىن تۇگەندەپ، تۇعىرىن ودان ءارى بەكەمدەۋ ءۇشىن اسا ماڭىزدى جۇمىستار، - دەپ جازدى ول.
