ءماجىلىس دەپۋتاتى داۋلەت مۇقاەۆ مادەنيەت جانە اقپارات ءمينيسترى ايدا بالاەۆاعا دەپۋتاتىق ساۋال جولدادى. بۇل جولى ول ءوز شىعىنىن اقتاماعان مەملەكەتتىك قارجىعا تۇسىرىلگەن "سانى بار، ساپاسى جوق" وتاندىق فيلمدەردىڭ ماسەلەسىن كوتەردى دەپ جازادى، "ادىرنا" ۇلتتىق پورتادى.
ءوز ساۋالىندا دەپۋتات مۇقاەۆ 10-عا جۋىق وتاندىق فيلمدەردىڭ ءتىزىمىن ايتىپ شىقتى.
"2023 جىلعى 17 ماۋسىمدا مەملەكەت باسشىسى قاسىم-جومارت توقاەۆ تۇركىستان قالاسىندا وتكەن ۇلتتىق قۇرىلتايدا وتاندىق كينو سالاسىن رەفورمالاۋ قاجەتتىگىنە ناقتى توقتالدى. بىراق بۇل سالاداعى ايقاي تولاستار ەمەس. كينو تۇسىرگىسى كەلگەندەر كوبەيگەنمەن، ولاردىڭ دەنى ءوز قاراجاتىنا ءتۇسىرىپ جاتىر. مەملەكەت تاراپىنان بولىنەتىن قارجىلاردىڭ كوبى «ءوز ارالارىندا» قالىپ جاتقانداي كورىنەدى. ويتكەنى، ۇلتتىق كينونى قولداۋ ورتالىعىنىڭ فيلمدەرى نە سۇرانىسقا، نە حالىق تاراپىنان قولداۋعا يە ەمەس. ءتىپتى، حالىق قازىناسىنداعى قارجىنى ميلليونداپ قۇمعا قۇيىپ جاتقاندايمىز. مىسالى، 2019-2023 جىلدار ارالىعىندا وتاندىق 100 فيلمگە شامامەن 23 ملرد. تەڭگە بولىنگەن. ەڭ قىزىعى ونىڭ بارلىعى 100 پايىز يگەرىلگەن. ەسەبى تاپسىرىلىپ، كينو تۇسىرىلگەن" دەدى ول.
سونداي-اق، ول ميلليارد قارجى جۇمسالىپ تۇسىرىلگەن فيلمدەردىڭ جيناعان كاسسالىق ۇلەسىن سىنادى:
"ەندى قاراڭىزدار، Atlas entertainment كومپانياسى تۇسىرگەن وتاندىق «ۆرەميا پاتريوتوۆ» فيلمىنە 1 ملرد. قارجى جۇمسالسا، ونىڭ كاسسالىق جيناعى نەبارى 10 ميلليون تەڭگە. بۇل كەتكەن سومانىڭ 1 پروتسەنتى عانا. كەلەسى، Satai film تۇسىرگەن «بوكسشى» فيلمىنە 900 ملن. جۇمسالسا، كاسسالىق جيناق نەبارى 25 ملن. تەڭگەنى قۇرادى. ءفيلمنىڭ يدەياسى، وليمپيادا چەمپيونى ساپيەۆ تۋرالى ەكەنىن بىلەسىزدەر. بىراق، كينو وتە ساپاسىز ءارى كورەرمەندەرگە اسەر سىيلاي المادى. سونداي-اق، مەدەت فيلم تۇسىرگەن «لەتو 1941-گو» وتاندىق كينوسىنا 700 ملن. قارجى بولىنسە، ونىڭ 2 ميلليونى عانا قايتارىلعان. بۇل كەتكەن شىعىننان 350 ەسەگە از. جانە دە، «جيزن» فيلمىنە 500 ميلليون كەتسە، نەبارى 650 مىڭ تەڭگەسى قايتقان. مىسالى، ورتا ەسەپپەن كينوتەاترلارداعى بيلەتتىڭ باعاسى 2000 تەڭگەنى قۇراسا، وندا بۇل ءفيلمدى 325 ادام كورىپتى-ءمىس. سوندا ءسىز بولىپ، ءبىز بولىپ «جيزن» دەگەن فيلمگە بيۋدجەتتەن جارتى ميلليارد كەتىرىپ، 325 ادام كورۋ ءۇشىن عانا تۇسىردىك پە؟!" دەپ اتاپ ءوتتى ماجىلىسمەن.
ەلدەگى مەملەكەت قاراجاتىنا تۇسىرىلگەن فيلمدەردىڭ اراسىندا ءوز شىعىنىن اقتاعان جالعىز فيلم - دوس-مۇقاسان ەكەنى اتاي كەتتى ول:
"ول – جارنامانىڭ السىزدىگى، وعان ارنايى قاراجاتتىڭ قاراستىرىلماۋى. مەملەكەت قولداۋىمەن تۇسىرىلگەن فيلمدەردىڭ جارناماسى جوقتىڭ قاسى. قانشاما فيلمدەر ءتۇسىرىلىپ، شاڭ باسقان ارحيۆتەردە جاتىر. تاۋەلسىزدىكتەن بەرى قاراي مەملەكەت قارجىسىنا 600-دەن اسا فيلم تۇسىرىلسە، سونىڭ ىشىندە ءوز-ءوزىن اقتاپ، پايداعا شىققان فيلم تەك «دوسمۇقاسان» عانا. ءبارىن ايتتا، ءبىرىن ايت، بيىلعى ۇلتتىق كينو ورتالىعىنىڭ پيتچينگتى وتە ءساتتى ۇيىمداستىرعانىن كوردىك. فيلمدەر ادىلەتتى ءارى الەۋمەتتىك جەلىدە اشىق تاڭدالدى. سوندىقتان، جاڭا باسشىلىققا جوعارىدا ورىن العان ماسەلەلەردى قاتاڭ ەسكەرۋ قاجەتتىگىن ايتامىز" دەدى مۇقاەۆ.
ءسوز سوڭىن داۋلەت مۇقاەۆ كينوجوبالاردىڭ جان-جاقتى مەحانيزمىن جەتىلدىرىپ، اتالمىش ماسەلەنى نازارعا الۋ قاجەتتىگىن ايتتى.
"قۇرمەتتى ايدا عالىمقىزى! بۇگىندە الەمدىك تاجىريبەدە كينو ەكونوميكانىڭ قوزعاۋشى درايۆەرى بولىپ وتىر. سوندىقتان مەملەكەت تاراپىنان قانشاما قاراجاتقا ءتۇسىرىلىپ جاتقان فيلمدەردىڭ قىزىعىن حالىق كورۋ قاجەت. مەملەكەتتەن قارجىلىق قولداۋ الۋعا ءۇمىتتى كينوجوبالارىمەن كەلگەن كينوگەرلەردى قولداۋدىڭ جان-جاقتى مەحانيزىمىن جەتىلدىرۋ قاجەت" دەدى ول.
