شىعىس قازاقستان، كۇرشىم اۋدانىندا قار جاۋىپ، تابيعي سيپاتتاعى توتەنشە جاعداي رەجيمى جاريالاندى، دەپ حابارلايدى “ادىرنا” ۇلتتىق پورتالى.
كۇرشىم اۋدانىندا قالىڭ قار مەن بوران جەتىنشى قاڭتاردان باستاپ توقتاماي تۇر. سينوپتيكتەردىڭ ايتۋىنشا، كەيبىر جەرلەردە قاردىڭ قالىڭدىعى ەكى مەترگە جەتەدى. شقو اكىمدىگىنىڭ ءباسپاسوز قىزمەتىنىڭ مالىمەتىنشە، اۋدان اۋىلدارىنىڭ تۇرعىندارى كولىك قاتىناسىنان ايىرىلعان.
اۋا-رايىنا بايلانىستى بۇگىن، 16 قاڭتاردا اۋدانعا ازىق-تۇلىك، قاجەتتى زاتتار مەن ءدارى-دارمەكتەردى جەتكىزۋ ءۇشىن تىكۇشاق جىبەرىلدى.
«جاعداي جەرگىلىكتى اتقارۋشى ورگانداردىڭ باقىلاۋىندا»، - دەپ حابارلادى شقو اكىمدىگى.
شقو كولىك جانە اۆتوموبيل جولدارى باسقارماسىنىڭ مالىمەتىنشە، جول ءجۇرۋدى قامتاماسىز ەتۋ ءۇشىن كۇرشىم اۋدانىنا قوسىمشا تەحنيكا جىبەرىلگەن. 20-دان استام ارنايى تەحنيكا جۇمىلدىرىلدى.
ايتا كەتەيىك، مارقاكول اۋدانىندا دا اۋا رايى قولايسىز. جەرگىلىكتى تۇرعىندار قار قۇرساۋىندا قالىپ قويعان اتتارىنان ايىرىلىپ قالا جازداعان.
“ادىرنا” ۇلتتىق پورتالى
