الايدا مەن تاڭ قالدىم، اقسۋاتقا باردىم دا،
نە كەرەمەت! بىلمەيمىن، ءبىر كەرەمەت بار مۇندا.
قادىر مىرزا-الىدەن اسىرىپ ەشتەڭە ايتا المايمىز. قازاقستانعا سايىپقىران سپورتشىلارى مەن ارقالى اقىندارى ارقىلى اتى جەر جارعان اقسۋات ەلى سوڭعى كەزدە اتىمتاي جومارت ۇلدارىنىڭ ارقاسىندا الەمگە تانىلۋدا. بادەلحان سابۋروۆ پەن دۋلات تاستەكەەۆ سوڭعى جىلدارى "ەر تۋعان جەرىنە" دەگەن ماقالدىڭ تەگىن ايتىلماعانىن دالەلدەپ ءجۇر. "تۋعان جەرگە تۋىڭدى تىك" دەگەن اتپەن بيىلعى وتكەن سپورت پەن ونەر فەستيۆالى ەكى كۇن بويى اقسۋات اسپانىن دۋمانعا بولەدى.
الدىمەن، 14-ءشى ماۋسىم كۇنى اتاقتى ەمشى، اۋليە ىرعىزباي دوسحاناۇلىنىڭ كەسەنەسىندە قۇران باعىشتاپ، اس بەرىلدى. وبلىس اكىمى دانيال احمەتوۆ جۇرت الدىندا ءسوز سويلەپ، بولاشاقتا اتقارىلار ىستەرمەن كوپشىلىكتى تانىستىرىپ ءوتتى. ارتىنان وبلىستىق اقساقالدار فورۋمى دا وسى كۇمىستىدە جالعاسىن تاپتى.
ايبەك نۇعىماروۆ الەمدىك گران-پري جەڭىمپازى!
اقسۋات اۋىلىندا جىلدا وتەتىن ىرعىزباي دوسحاناۇلى اتىنداعى قازاق كۇرەسىنەن الەمدىك گران-ءپريدى الىس-جاقىن شەت ەل بىلەتىن جاعدايعا جەتتى. بيىلعى بايراقتى باسەكەگە 28 مەملەكەتتەن الپىسقا جۋىق پالۋان جينالىپ، شارشى الاڭىن شاڭىن اسپانعا شىعاردى.
وتكەن اپتادا عانا “قازاقستان بارىسىنىڭ” جەڭىمپازى اتانعان ايبەك نۇعىماروۆ بۇل جارىستىڭ ءفاۆوريتى بولاتىن.
بىراق، اقتىق سىنعا شىعۋ ايبەككە دە وڭاي بولمادى. گرۋزين پالۋانىمەن وتكەن جارتىلاي فينالدان كەيىن ايبەك اقتىق سىندا وزبەكستاندىق مۇقسين حيسامەدينوۆپەن بەلدەستى. وزبەك ەلىنىڭ پالۋانىنان ايلاسىن اسىرعان نۇعىماروۆ جەڭىمپاز اتاندى. ال، گرۋزيالىق گەوردجي كاتارادزە ءۇشىنشى ورىنعا تابان تىرەدى.
جەتپىس كەلى سالماقتا قولا جۇلدەگە مولدوۆا سپورتشىسى گەوردجە روكۋ، كۇمىسكە قازاقستاندىق وسكەن تولەۋبەكوۆ، ال التىن جۇلدەگە گرۋزيالىق زۆياد ودوشەشۆيلي يە بولدى.
80 كەلى سالماقتا ءبىرىنشى ورىندى تاجىكستان سپورتشىسى حامروز رادجابو، ەكىنشى ورىندى گرۋزيالىق كاحا مومۋلاشۆيلي، ءۇشىنشى ورىندى قازاقستاندىق بەكزات ماناسباەۆ يەلەندى.
جەڭىمپازدارعا 2 ميلليون تەڭگە، ەكىنشى ورىنعا 1 ميلليون، ءۇشىنشى ورىن العان سپورتشىعا 500 مىڭ تەڭگە تابىستالدى.
جەڭىس تۇعىرىنا كوتەرىلگەن پالۋاندارعا سىيلىقتى اتاقتى بوكسشى قانات يسلام، اقىن ءجۇرسىن ەرمان، اقسۋات اۋىلىنىڭ قۇرمەتتى ازاماتى تۇرسىن تاستەكەەۆتەر ماراپاتتادى.
قازاق كۇرەسى ءتۋرنيرى اياقتالعاننان كەيىن اۋدان اكىمى س.سادۋاقاسوۆ وسى كەشتىڭ قوناعى ءارى "Qazaq Promotions" كومپانياسىنىڭ ۇيىمداستىرۋىشىسى قانات يسلامدى اۋدان حالقىنىڭ اتىنان قۇتتىقتاپ، حالقىمىزدىڭ ءداستۇرى بويىنشا ات مىنگىزدى.
قانات يسلامنىڭ ۇيىمداستىرۋىمەن اقسۋات توپىراعىنا كەلگەن بوكسشىلار اشىق اسپان استىنا كەرىلگەن رينگتە كەرەمەت كاسىپقوي بوكس كەشىن وتكىزدى.
140 شاقىرىمدىق الامان بايگە!
بيىلعى بايگەنىڭ جارناماسى اتىراۋ مەن التايدىڭ اراسىن دۇرلىكتىردى. ەندى شە، 140 شاقىرىمدىق الامان بايگە بۇرىن-سوڭدى وتپەگەن. "تويدىڭ بولعانىنان بولادىسى قىزىق"دەگەندەي كوپتەن كۇتكەن بايگە دە كەلىپ جەتتى. تاڭعى 4-تە كورشىلەس كوكپەكتى اۋدانىنان جىبەرىلگەن 107 تۇلپاردىڭ تۇسكە تاياۋ 11-ءى مارەگە جەتتى.
الامان بايگە قورىتىندىسى بويىنشا ءبىرىنشى ورىندى اقسۋاتتىق ءامىرعاليەۆ الماستىڭ تۇلپارى يەلەنىپ، يەسىنە "نيۆا" كولىگىن مىنگىزدى. ەكىنشى ورىندى كاتون قاراعاي اۋدانىنان كەلگەن تۇرسىنبەكوۆ قۋانىشتىڭ تۇلپارى الدى. ات يەسىنە "گرانتا" كولىگىنىڭ كىلتىن تابىستادى. ءۇشىنشى ورىن كورشىلەس كاتون قاراعاي اۋدانى، ۇلكەن نارىن اۋىلىنان اكەلىنگەن قاجىعاليەۆ قۇرمەتتتىڭ تۇلپارىنا بۇيىرسا، ءتورتىنشى ورىندى الىستاعى الماتى وبلىسى، سارقاند اۋدانىنان كەلگەن نۇرمۇحامبەتوۆ ءداۋىرجاننىڭ تۇلپارى ەنشىلەدى.
جالپى جارىس قورىتىندىسى بويىنشا 9 تۇلپارعا جۇلدەلى سىيلىقتار بەرىلدى. «جىلقىنىڭ تەرى» دەگەن بايگەنىڭ ىرىمى بويىنشا جارىسقا دەمەۋشىلىك تانىتقان ازاماتتار 10 جانە 11 بولىپ مارە سىزىعىن كەسىپ وتكەن جىلقى يەلەرىنە قارجىلاي سىيلىقتاردى تابىستادى.
25 شاقىرىمدىق الامان جارىس قورىتىندىسى بويىنشا ءبىرىنشى ورىندى الماتى وبلىسى، ۇزىناعاش اۋىلىنان كەلگەن ۇمبەتوۆ عابيتتىڭ جۇيرىگى يەلەندى. ەكىنشى ورىندى جارما اۋدانى، قالباتاۋ اۋىلىنان كەلگەن شاپاتوۆ قايراتتىڭ بايگە اتى السا، ءۇشىنشى ورىن الماتى قالاسىنان اكەلىنگەن رۋستامۇلى ابدۋلساماتتىڭ اتىنا بۇيىردى.
ءبىرىنشى ورىن العان ۇمبەتوۆ عابيتكە اۆتوكولىكتىڭ كىلتى تابىستالدى.
15 شاقىرىمدىق توپتىق جارىس قورىتىندىسى بويىنشا ءبىرىنشى ورىندى جارما اۋدانى، قالباتاۋ اۋىلىنان كەلگەن شاپاتوۆ قايراتتىڭ اتى الدى، ەكىنشى ورىندى تارباعاتاي اۋدانى، كوكجىرا اۋىلىنىڭ تۇرعىنى باعدات شاحكەرىمنىڭ اتى يەلەنسە، ءۇشىنشى ورىن اقسۋات اۋىلىنىڭ اتىنان قوسىلعان ەسكەندىروۆ ساعيدىڭ تۇلپارىنا بۇيىردى.
بۇل جارىس تۇرىنەن دە ءبىرىنشى ورىن العان ات يەسىنە اۆتوكولىكتىڭ كىلتى تابىستالدى.
10 شاقىرىمدىق جورعا جارىس قورىتىندىسى بويىنشا ءبىرىنشى ورىندى اقسۋات اۋىلىنىڭ تۇرعىنى بايجاساروۆ ساقانىڭ جورعاسى ەنشىلەدى، ەكىنشى ورىن الماتى وبلىسى، ۇزىناعاش اۋىلىنان اكەلىنگەن بازارباي ورازبەكتىڭ جىلقىسىنا بۇيىردى، ءۇشىنشى ورىندى الماتى وبلىسى، قاراساي اۋدانىنان كەلگەن ساۆچەنكو پاۆەلدىڭ جورعاسى الدى.
5 شاقىرىمدىق تاي جارىس قورىتىندىسى بويىنشا الماتى وبلىسى، تالعار قالاسىنان كەلگەن بۇلعىنوۆ مەرحاتتىڭ تايى السا، ەكىنشى ورىندى اياگوز اۋدانى، شىڭعوجا اۋىلىنان كەلگەن اقىمجانوۆ ەرلاننىڭ تايى الدى، ءۇشىنشى ورىن اياگوز اۋدانى، مامىرسۋ اۋىلىنان كەلگەن ابراحمانوۆ قايراتتىڭ تايىنا تيەسىلى بولدى.
اقىندار شىقتى ايتىسقا...
"اقىندار ەلى"اتانعان اقسۋاتتا ءاۋ دەمەيتىن ادام جوق. بۇل تۋرالى تاعى دا قادىر اقىنعا جۇگىنەمىز.
"شەتتەرىنەن ءبارى اقىن، ادەپ ساقتاپ ارەڭ ءجۇر،
ساۋساق تولعان ونەر دە، كومەي تولعان ولەڭ-جىر".
وسى ولكەنىڭ مىرزا پەرزەنتى دۋلات تاستەكەەۆ ءتورتىنشى جىل قاتارىنان ءجۇرسىن ەرمان باستاعان جىر-كەرۋەنىن اقسۋاتقا شوگەرۋدە. بيىل دا 12 اقىن، 6 جۇپ ستاديون تولى حالىقتىڭ الدىندا ولەڭ مەن جىر توكتى. ەكى اينالىم، 5 ساعات بويى توقتاۋسىز جىرلاعان اقىندارعا حالىق تا قوشەمەتىن ايامادى. ورتاسىندا "اقسۋاتتىڭ ەركە قىزى" اتانعان مايرا ءىلياسوۆا باستاعان انشىلەر اقىنداردى دەمالدىرىپ، اننەن شاشۋ شاشتى.
قۇرامىندا اقىن، ۇلىقبەك ەسداۋلەت، سازگەر التىنبەك قورازباەۆ، ابايتانۋشى ومار جالەل، ايتىسكەر اقىندار سەرىك قاليەۆ، داۋلەتكەرەي كاپۇلى، باۋىرجان حاليوللا، سەرىكزات دۇيسەنعازى قازىلارعا مىقتىنى انىقتاۋ وڭاي بولمادى.
ايتىس قورتىندىسى بويىنشا، باس جۇلدە قىتايدان كەلگەن ەرلان امانقوجاۇلىنىڭ قانجىعاسىنا بايلاندى.
1-ورىندى قانات مىرزاحان يەلەنسە، 2-ورىن باتىسقازاقستاندىق جانسايا مۋسيناعا، 3-ورىن تارباعاتاي اۋدانىنىڭ اقىنى رۇستەم قايىرتايۇلىنا بۇيىردى.
ارنايى جۇلدە اقىن مۇحتار نيازوۆ پەن ارۋنا كەرىمبەككە تيەسىلى بولدى. دۋلات تاستەكەەۆتىڭ ارنايى ستيپەنەدياسى باياناۋىلدىق اسپانبەك شۇعاتاەۆ الدى.
ايتىستىڭ نەگىزگى دەمەۋشىسى د.تاستەكەەۆ "تاريحقا تولى تارباعاتاي" الماناحىنىڭ ءتورتىنشى تومىن تانىستىرىپ، قوناقتارعا سىيعا تارتتى. كەش سوڭى "مۋزارت" توبىنىڭ انشىلەرىنىڭ انشاشۋلارىمەن جانە وتشاشۋمەن اياقتالدى.
تارباعاتاي تاۋىنىڭ باۋىرىن دۇبىرگە بولەگەن ۇلان-اسىر توي دا اياقتالدى. اۋدان اكىمى سەرىكجان سادۋاقاسوۆتىڭ ۇيىتقى بولۋىمەن، جۇرتتىڭ جۇدىرىقتاي جۇمىلۋىمەن، بەرەكە-بىرلىكتىڭ ايعاعىنداي وتكەن توي بولدى. كورشى اۋداندار دا دۋماندى دودادان شەت قالماي كيىز ۇيلەرىن تىگىپ، اقسۋاتتىڭ قوناقتارىن بىرگە كۇتتى. ايتىستاعى اقىندار ايتقانداي ءار اۋداندا دۋلات تاستەكەەۆ سەكىلدى ءبىر ۇل بولسا، قازاقستان باياعىدا داميتىن ەدى. تاڭ شىعىستان اتقاندا، ءبىز دە الاتاۋدى بەتكە الدىق. ءتىلىمىزدىڭ ۇشىندا قادىر مىرزا-ءالىنىڭ اتاقتى "اقسۋات" ولەڭى.
تاۋسىلمايدى بۇل جەردە سىي ءتۇنى مەن سىي كۇنى،
اقسۋاتتىڭ قوناعى بىلمەۋ كەرەك ۇيقىنى.
اقسۋاتتىڭ قوناعى—بالاسى دا، قارتى دا،—
اتتانادى امالسىز، قاراي-قاراي ارتىنا!
سەنبەگەندەر سوزىمە بارىپ كورسىن، بايقاسىن!
تۋماساڭ دا بۇل جەردە.
پەرزەنتى بوپ قايتاسىڭ.
مەنىڭ جۇرتىم وسىنداي دەپ ماقتانىپ ايتاسىڭ،
ءوز ەلىڭە ون ەسە جاقىن بولىپ قايتاسىڭ.
تارباعاتاي تاۋىنىڭ ەسكە ساقتاپ ءار تاسىن،
تۇك الماي-اق تۋىسقا قارىزدار بوپ قايتاسىڭ!
وڭعار قابدەن
"ادىرنا" ۇلتتىق پورتالى
الماتى-اقسۋات-الماتى
