وزبەكستان بيلىگى قازاقستاننان جەتكىزىلگەن ەلەكتر جابدىقتارىن قايتا تەكسەرۋگە شەشىم قابىلداعانى بەلگىلى بولدى، دەپ حابارلايدى "ادىرنا" ءتىلشىسى فەرعاناعا سىلتەپ.
وزبەكستان بيلىگى 2021-2022 جىلدارى قازاقستاننان اكەلىنەتىن ەلەكتر جابدىقتارىنىڭ شىعۋ تەگى سەرتيفيكاتتارىن قايتا تەكسەرۋگە شەشىم قابىلداپتى. سەبەبى بيلىك بۇل تاۋارلاردى «كۇدىكتى» دەپ ساناۋدا. بۇل تۋرالى وزبەكستان پرەمەر-ءمينيسترىنىڭ ورىنباسارى ءجامشيد حودجاەۆ باسقاراتىن ۇكىمەتتىك كوميسسيانىڭ حاتتاماسىندا كورسەتىلگەن.
وزبەكستان بيلىگى قولدانىستا قازاقستاندىق تەحنيكانىڭ ارتقانىن ايتىپ، دابىل قاققان. ۇكىمەت كورشىلەس مەملەكەتكە قازاقستاننان جەتكىزىلەتىن تۇرمىستىق تەحنيكانىڭ قىتايدا شىعارىلعان بولۋى مۇمكىن ەكەنىن ايتادى. ال تاۋارلاردى تمد ەلدەرى شەڭبەرىندە وزبەكستان نارىعىنا باجسىز جەتكىزۋ ءۇشىن تەك مينيمالدى وقشاۋلاۋدى جۇزەگە اسىرۋدا دەپ سانايدى.
وزبەكستاننىڭ ينۆەستيتسيالار، يندۋستريا جانە ساۋدا مينيسترلىگى، «وزبەكەكسپەرتيزا» كومپانياسى جانە كەدەن كوميتەتى قازاقستاننان جەتكىزىلگەن ەلەكتر جابدىقتارىنىڭ شىعۋ سەرتيفيكاتتارىن قايتا تەكسەرەتىن بولادى.
وتكەن جىلى وزبەكستان باسشىسى شاۆكات ميرزيەەۆ سوڭعى بەس جىلدا ەلەكتر ونەركاسىبىندە جالپى قۇنى 640 ميلليون دوللار بولاتىن 224 جوبا ىسكە قوسىلعانىن حابارلادى. دەگەنمەن دە پرەزيدەنت تۇرمىستىق تەحنيكانىڭ يمپورتى جىلىنا 800 ميلليون دوللاردى قۇراعانىن دا اتاپ ءوتتى.
