Qazaqstanǵa Qytaıdan kelgen týrıster aǵyny 17 esege artty. Buǵan ózara vızasyz rejımge kóshý jáne elder arasynda tikeleı áýe qatynasynyń ashylýy yqpal etti, dep habarlaıdy “Adyrna” ulttyq portaly 24KZ saıtyna silteme jasap.
Týrızm mınıstrligi bıyl sheteldik qonaqtardyń sany budan da kóp bolady dep senedi. Týrısterdi tartý úshin 500 mıllıon teńgeden astam qarjy bólinip, týrıstik salyq ta alynyp tastaldy.
Elimizge Qytaı azamattarymen qatar Túrkııa, Úndistan jáne AQSh azamattary da jıi kelýde. Sondaı-aq kórshiles elderden: Ózbekstan, Reseı, Qyrǵyzstan jáne Tájikstan elderinen týrıster sany turaqty túrde artyp keledi.
“Qazaqstan týrısterdi óziniń landshafttarymen, mádenı baılyǵymen, mádenı murasymen qyzyqtyrady. Sheteldikter bizdiń basty qalalarymyz – Astana, Almaty, Shymkent, sondaı-aq Túrkistan jáne Atyraý oblystaryna barǵandy jón kóredi. Trendter tabıǵı týrızm, ekotýrızm salasynda. Týrısterdiń ózderi de osyǵan erekshe mán beredi: «Olar ulttyq saıabaqtarda serýendep, joryqtarǵa qatysqysy keledi», - deıdi “Kazakh Tourism” UK” AQ ókili Álisher Tursyn.
”Adyrna” ulttyq portaly
