مۇنداي ادام بولاشاقتا ءالى تالاي سوراقىلىقتى كورسەتەدى دەگەن ەدى. راسىندا سولاي بولدى.
الەمگە، ءوز ەلىنە كەلەڭسىز جاعدايلارمەن تانىلعان مادەنيەت ءمينيسترى قازاقستان تاريحىندا عانا بولعان شىعار. ەستەرىڭىزدە مە، يليا يلين ءتورتىنشى مارتە الەم بىرىنشىلىگىنىڭ التىنىن قانجىعاسىنا بوكتەرىپ، ءانۇرانىمىز وينالىپ جاتقاندا ارىستانبەك مۇحامەديۇلى تولاعاي ۇلىمىزعا ۇيالى تەلەفوندى تىقپالاي بەرگەنى. سول كەزدە كوپشىلىك باق بەتىندە، الەۋمەتتىك جەلىلەردە مەملەكەتتىك رامىزگە قۇرمەتسىزدىك تانىتقان ورەسى تار شەنەۋنىكتى جاۋاپقا تارتۋ كەرەك دەپ جارىسا جازعان. بىراق، ول زاڭ شەڭبەرىندە جازالانبادى. ال ءمينيستردىڭ ءوزى ءمىز باقپادى. مۇنداي ادام بولاشاقتا ءالى تالاي سوراقىلىقتى كورسەتەدى دەگەن ەدى. راسىندا سولاي بولدى.
مادەنيەت مينيسترلىگى رەسپۋبليكالىق، حالىقارالىق دەپ ايدار تاعىلعان كونتسەرتتەر وتكىزۋدەن، دۇرىسى اسابالىق قىزمەتتەن ارى اسپادى. "رۋحاني جاڭعىرۋ", تاريحي-مادەني، ونەر باعىتىندا سۇبەلى جۇمىستارىن كورە المادى. كەرىسىنشە، بىلدەي "مادەنيەتتى" ءمينيستردىڭ اتى ستۋدەنت قىزدارعا ىڭعايسىز ۇسىنىس جاسايتىندىعى، "قازاقفيلمدەگى» ءبىر باسقوسۋدا ءوزىنىڭ داۋسىنا ۇقساس ادامنىڭ اقشانى قالاي "جىمقىرۋ" كەرەكتىگى تۋرالى ايتقانى سەكىلدى جۇرتتىڭ جاعاسىن ۇستاتقان قاۋەسەت-داۋلارمەن شىعىپ جاتتى. ال 2018 جىلدىڭ كۇزىندە مەردىگەر مەكەمە وكىلىنەن پارا العان مادەنيەت مينيسترلىگىنىڭ لاۋازىمدى شەنەۋنىكتەرى جۇمىسىنان شەتتەتىلدى. اناۋ-مىناۋ ەمەس، ارەكەڭنىڭ بىرگە تىزە قوسىپ جۇمىس ىستەپ جۇرگەن سەنىمدى ادامدارى - جاۋاپتى حاتشى مەن دەپارتامەنت ديرەكتورى. قاراماعىنداعى قىزمەتكەرلەر جەمقورلىقپەن ايىپتالسا دا مينيستر وتستاۆكاعا كەتپەدى.
ال بيىل، ياعني بۇگىن ونىڭ قىزمەتىنەن بوساتىلعانىنا كوبىسى قۋانعانىمەن، ارتىنشا لەزدە ولاردىڭ كوڭىلى سۋ سەپكەندەي باسىلدى. مۇحامەديۇلىنىڭ 2014 جىلى مينيسترلىككە الىپ كەلىپ، تاربيەلەگەن كادرى اقتوتى رايىمقۇلوۆا مس ءمينيسترى اتانىپ شىعا كەلدى. ونىڭ سوڭعى قىزمەتى ۆيتسە-مينيستر بولىپتى. ءبىر سوزبەن ايتقاندا، بىلىققا باتقان سالانىڭ جۇمىسىنا كوزى ۇيرەنگەن ادامدى ءوز ورنىنا قالدىردى. حالىق مۇنى كورىپ وتىر. قوسىلعىشتاردىڭ ورنىن اۋىستىرعانمەن قوسىندىسى وزگەرمەيتىنىن جاقسى بىلەدى.
بۇعان قوسا... قۇرمەتتى قاسىم-جومارت كەمەلۇلى، ءسىز قىزمەتكە جاستاردى اكەلەتىنىڭىزدى ايتقان ەدىڭىز. بىراق مىنا تاعايىنداۋدان وزگەرىس بايقالمايدى. ويتكەنى، ارىستانبەك مۇحامەديۇلى 1963 جىلعى بولسا، اقتوتى رايىمقۇلوۆا 1964 جىلى تۋعان. پرەزيدەنت مىرزا، ەلىمىزدىڭ مادەنيەت سالاسىن باسقارۋعا لايىق، جاڭاشىل، ىسكەر جاستار كوپ ەمەس پە؟ ولاردىڭ باعىن نەگە بايلايمىز؟ ارىبەرىدەن سوڭ مادەنيەت مينيستىرلىگىن مۋزىكانتتار عانا باسقارسىن دەگەن قاعيدا جوق قوي. مادەنيەت تەك مۋزىكادان تۇرمايتىنى تاعى بەلگىلى. سوندىقتان، ۇلتجاندى، پاتريوت، ەل الدىندا جاۋاپكەرشىلىكتى سەزىنەتىن جاستار وسى سالاعا دا اۋاداي قاجەت.
سەيىلحان ءالنازاروۆ
"ادىرنا" ۇلتتىق پورتالى
