قازاقستان پوليتسياسى جىل باسىنان بەرى ىزدەۋدە جۇرگەن 58 ادامدى ۇستادى، دەپ حابارلايدى "ادىرنا" ۇلتتىق پورتالى Polisia.kz سايتىنا سىلتەمە جاساپ.
"جىل باسىنان بەرى ىشكى ىستەر مينيسترلىگىنىڭ جەدەل قىزمەتتەرى مەن ونىڭ بولىمشەلەرى 58 قىلمىسكەردى انىقتاپ، ۇستادى. ولاردىڭ اراسىندا اۋىر جانە اسا اۋىر قىلمىس جاساعانى ءۇشىن ىزدەۋدە جۇرگەندەر دە بار", - دەلىنگەن سەنبى كۇنى تاراتقان حابارلامادا.
"وزبەكستاننىڭ ۇشقورعان قالاسىندا جەرگىلىكتى ءتارتىپ ساقشىلارى الماتى وبلىسى ءىىد كريمينالدىق پوليتسيا قىزمەتكەرلەرىمەن بىرلەسىپ، ەكى كىسى ولتىرگەنى ءۇشىن ىزدەۋدە جۇرگەن وسى ەلدىڭ ازاماتىن ۇستادى. 2012 جىلى الماتى وبلىسى ەڭبەكشىقازاق اۋدانىندا جۇمىس ىستەپ جۇرگەن ەر ادام ماس كۇيىندە زەينەتكەرلەردىڭ ۇيىنە زاڭسىز كىرىپ، كىسى ءولتىرىپ، اقشا ۇرلاعان", - دەيدى ءىىم كريمينالدىق پوليتسيا دەپارتامەنتى باستىعىنىڭ ورىنباسارى رۋسلان نازاروۆ.
سونداي-اق، پوليتسيانىڭ حابارلاۋىنشا، "ەلوردالىق پوليتسەيلەر قوستانايلىق ارىپتەستەرىمەن بىرلەسىپ، 2020 جىلى استاناداعى جوبالاۋ-جوسپارلاۋ تۇرعىن ءۇي كەشەنىنە ينۆەستيتسيا سالۋ جانە پاتەرلەردى برونداۋ دەگەن جەلەۋمەن تاعى ەكى جشس باسشىلارىمەن بىرگە 144 ۇلەسكەردىڭ 4 ميلليارد تەڭگەدەن استام اقشاسىن يەمدەنگەن جشس ءبىرىنىڭ ديرەكتورى مەن قۇرىلتايشىسىن ۇستادى".
"سونىمەن قاتار، رەسپۋبليكانىڭ كريمينالدىق پوليتسياسىنىڭ قىزمەتكەرلەرى ءىز-ءتۇزسىز جوعالعان 30 ادامنىڭ مەكەن-جايىن انىقتادى", - دەپ قوستى نازاروۆ.
"ادىرنا" ۇلتتىق پورتالى
