شقو-دا تۇڭعىش رەت وتكىزىلگەن 140 شاقىرىمدىق ات بايگەسى ءوز مارەسىنە جەتتى
ات جارىسى ۇشكىندىك "تۇعىرى بيىك تارباعاتاي" ونەر مەن سپورت فەستيۆالى اياسىندا ءوتتى.
تاڭعى ساعات 4-تە 140 شاقىرىمعا ارنالعان ات بايگەسى باستالدى. قازاقستاننىڭ ءار ايماعىنان كەلگەن 106 شاباندوز كوكپەكتى اۋىلىنان اقسۋات اۋىلىنا دەيىن بايگەگە ءتۇستى. جارىستىڭ شىنايى ءارى ءادىل ءوتۋىن قامتاماسىز ەتۋ ماقساتىندا جىلقىلار GPS جۇيەسىمەن قامتاماسىز ەتىلدى. قازاق كۇرەسىنەن حالىقارالىق فەدەراتسياسىنىڭ ۆيتسە-پرەزيدەنتى باتىرحان قامىنحانۇلىنىڭ مالىمدەۋىنشە، بۇل ەلىمىزدە وسىنداي قاشىقتىقتا وتكىزىلىپ وتىرعان تۇڭعىش بايگە. - ات جارىسى ەلباسىنىڭ " ۇلى دالانىڭ جەتى قىرى" ماقالاسى اياسىندا ات جارىسى مەن اتبەگىلىكتى جاندانداندىرۋ ماقساتىندا وتكىزىلىپ وتىر.
بۇگىن شاباندوزدار ءۇشىن ۇلكەن مەرەكە بولدى. جىلقىلار ۇزىن قاشىقتىقتا جوعارى شىدامدىلىقتارىن كورسەتىپ، ۇلتتىق سالت-ءداستۇرىمىزدى دارىپتەي تۇستىك،-دەدى باتىرحان قامىنحانۇلى. شاباندوزدار 8 ساعاتتان استام جول ءجۇرىپ ءوتتى.
ۇلكەن جارىستىڭ جەڭىمپازى كوكپەكتى اۋدانىنىڭ تۇرعىنى رۋسلان شايارگازين اتاندى. - بۇگىن ۇلكەن جارىس بولدى. جول ءجۇرۋ بارىسىندا قيىندىقتار بولدى. بىراق اتتارىمىز شىدامدىلىق تانىتىپ، بىرنەشە مارتە دەمالىپ، اقتىق مارەگە ءبىرىنشى جەتتىك. استىمداعى تۇلپارىمنىڭ جاعدايىن ۇدايى باقىلاپ، توزىمدىلىگىنىڭ ناتيجەسىندە جەڭىمپاز اتاندىق،- دەدى قۋانىشىن جاسىرا الماعان شاباندوز.
بۇل كۇن قازاقستاندىق ات سپورتى تاريحىنا ەنەرى ءسوزسىز. ۇيىمداستىرۋشىلار كوميتەتىنىڭ وكىلى، وبلىستىق دەنەشىنىقتىرۋ جانە سپورت باسقارماسىنىڭ باسشىسى دەنيس رىپاكوۆ: -ەلىمىزدىڭ شىعىسىندا حالىقارالىق بايگەنىڭ ءوتۋى-قازاقستاندىق ات سپورتىندا ايتۋلى وقيعا. جارىسقا ارنايى دايىندالعان جۇيرىكتەر قاتىسىپ، مارافوندىق شىدامدىلىق تانىتتى. بۇنىڭ بارلىعى ۇلكەن تاباندى ەڭبەك. الداعى ۋاقىتتا بۇل بايگە ءتۇرىن وتكىزۋدى داستۇرگە اينالدىرماقپىز. قاتىسۋشىلار ءتىزىمى دە كەڭەيەتىن بولادى،- دەدى.
سونىمەن قاتار فەستيۆال اياسىندا ءار قاشىقتىقتا تاي جارىسى، جورعا جىرىسى، تاي بايگە جانە الامان بايگە ءوتتى.
"ادىرنا" ۇلتتىق پورتالى
