سولتۇستىك قازاقستان وبلىسى اكىمدىگىنىڭ دەنە شىنىقتىرۋ جانە سپورت باسقارماسىنا قاراستى «تايىنشا اۋدانىنىڭ بالالار مەن جاسوسپىرىمدەر سپورت مەكتەبى» 19 955 357 تەڭگەگە 1 دانا «قاراقۇيرىق» ساتىپ الماق، - دەپ حابارلايدى ادىرنا ۇلتتىق پورتالى https://satypalu.gov.kz/ سايتىنا سىلتەمە جاساپ.
جالپى قۇنى شامامەن 20 ميلليون تەڭگەگە باعالانعان ول قانداي «قاراقۇيرىق»؟ مەملەكەتتىك ساتىپ الۋ پورتالىنداعى تەندەر «سپورت مەكتەبىنە قاراقۇيرىق ساتىپ الۋ» دەگەن اتاۋمەن جاريالانعان. وتىنىمدەردى قابىلداۋ 9 قاڭتار كۇنى باستالىپ، تەندەر جەڭىمپازى 16 قاڭتار كۇنى انىقتالۋى ءتيىس.
پورتالدا اتاۋى قازاقشا بەرىلگەن تەندەردىڭ تەحنيكالىق سيپاتتاماسىن قارادىق. ونداعى باستى ماقساتىمىز «قاراقۇيرىق» دەگەننىڭ نە ەكەنىن ءبىلۋ ەدى. سويتسەك، تەحنيكالىق سيپاتتامادا مەملەكەتتىك تىلدە ءبىر اۋىز ءسوز دە جازىلماپتى.
رەسمي ورىس تىلىندە عانا جازىلعان ۇزاق ماتىننەن ۇققانىمىز قاراقۇيرىق دەگەن – ميكرواۆتوبۋس ەكەن. «تايىنشا اۋدانىنىڭ بالالار مەن جاسوسپىرىمدەر سپورت مەكتەبى» 19 955 357 تەڭگەگە جاڭا ميكرواۆتوبۋس ساتىپ الماق كورىنەدى.
تاپسىرىس ورىنداۋشى سىيىمدىلىعى 40 ورىننان اسپايتىن، ۇزىندىعى 6-7,5 مەتردەن كەم ەمەس ميكرواۆتوبۋستى شارت جاساسقاننان كەيىن 20 كۇن ىشىندەجەتكىزىپ بەرۋگە مىندەتتەلەدى-ءمىس.
ءبىزدى مىناداي سۇراقتار مازالايدى. سولتۇستىك قازاقستان وبلىسىنىڭ دەنە شىنىقتىرۋ جانە سپورت باسقارماسىندا مەملەكەتتىك ءتىلدى بىلەتىن ءبىر مامان جوق پا؟ سولتۇستىكتىڭ شەنەۋنىكتەرى ميكرواۆتوبۋستى قاراقۇيرىق دەپ اۋدارىپ، قازاق ءتىلىن ماسقارالاعىسى كەلە مە؟ تەحنيكالىق سيپاتتامنىڭ قازاقشا نۇسقاسى نەگە جوق؟ باسقارما مەملەكەتتىك ءتىلدى شەتتەتىپ، ءتىل تۋرالى زاڭدى ورەسكەل بۇزىپ وتىرعان جوق پا؟
بۇل ساۋالداردى ءتيىستى مەكەمەگە جولدادىق. جاۋابى كەلگەن سوڭ، ولاردىڭ ايتار ءۋاجىن دە وقىرمان نازارىنا ۇسىناتىن بولامىز.
قانات بىرلىكۇلى
“ادىرنا” ۇلتتىق پورتالى
