8 قاڭتار كۇنى گەرمانيادا نەمىس شارۋالار وداعى (DBV) ۇيىمداستىرعان نارازىلىق اپتالىعى باستالادى. فەرمەرلەر ۇكىمەتتىڭ اۋىل شارۋاشىلىعىنا بەرىلەتىن سۋبسيديالاردى قىسقارتۋعا جوسپارلاعانىنا نارازىلىق بىلدىرۋدە، دەپ حابارلايدى “ادىرنا” ۇلتتىق پورتالى.
جالپى گەرمانيا بويىنشا فەرمەرلەردىڭ 100-دەن استام نارازىلىق اكتسياسى جوسپارلانعان.
كوپتەگەن ايماقتا كولىك قوزعالىسى پروبلەمالارى كۇتىلۋدە. ويتكەنى فەرمەرلەر دەمونستراتسيالار اياسىندا تراكتورلارمەن جولداردى جابۋدى جوسپارلاپ وتىر. DBV باسشىسى يواحيم رۋكۆيد گەرمانيا تۇرعىندارىن ىقتيمال قولايسىزدىققا بايلانىستى تۇسىنىستىكپەن قاراۋعا شاقىردى.
ء"بىز نارازىلىق اكتسياسىن بەيبىت جانە دەموكراتيالىق جولمەن ۇيىمداستىرعىمىز كەلەدى. بىراق ءبىز تراكتورلارمەن قوزعالعاندا، بۇل ءسوزسىز جول قوزعالىسىنىڭ بۇزىلۋىنا اكەلەدى", - دەدى رۋكۆيد Stern جۋرنالىنا بەرگەن سۇحباتىندا.
نەمىس فەرمەرلەرى جەلتوقسان ايىنان بەرى جاپپاي نارازىلىق اكتسيالارىن ۇيىمداستىرىپ جاتىر. 2024 جىلى بيۋدجەتتى ۇنەمدەۋ اياسىندا فەرمەرلەر ديزەلدىك وتىنعا جەڭىلدىكتەر مەن سالىق جەڭىلدىكتەرىنەن ايىرىلادى. گەرمانيا قارجى مينيسترلىگىنىڭ باعالاۋى بويىنشا، بۇل شارا بيۋدجەتتەن جىل سايىن 480 ميلليون ەۋرو ۇنەمدەۋگە مۇمكىندىك بەرەدى.
كەيىن گەرمانيا مينيسترلەر كابينەتى ءوز جوسپارلارىن تۇزەتۋگە شەشىم قابىلدادى. دەگەنمەن، نەمىس شارۋالار وداعى اۋىلشارۋاشىلىق سالاسى ءۇشىن جوسپارلانعان سالىقتى كوتەرۋدى قابىلدامايتىندارىن باسا ايتىپ، نارازىلىقتارىن تاستامادى.
"بۇل جوسپارلاردى كۇن تارتىبىنەن الىپ تاستاۋ كەرەك. ءبىز ءوز ويىمىزدى وزگەرتپەيمىز", - دەدى رۋكۆيد
بىرنەشە كۇن بۇرىن فەرمەرلەر پارومدا ۆيتسە-كانتسلەر روبەرت حابەككە توسقاۋىل قويعان. ساياساتكەر دەمالىستان قايتىپ كەلە جاتقاندا، ونى پيرستانعا اشۋلى نارازىلىق بىلدىرۋشىلەر كۇتىپ الدى. حابەك ءوز وكىلدەرىمەن سويلەسۋدى ۇسىندى، بىراق فەرمەرلەر ونىڭ ۇسىنىسىن قابىلدامادى. پوليتسەيلەر پارومدى اشۋ ءۇشىن كوزدەن جاس اعىزاتىن گاز قولدانعان.
گەرمانيا ۇكىمەتى بۇل وقيعانى قاتاڭ ايىپتادى. ءوز كەزەگىندە گەرمانيانىڭ ىشكى ىستەر مينيسترلىگى وڭشىل ەكسترەميستىك كۇشتەردىڭ فەرمەرلەردىڭ نارازىلىعىن ءوز ماقساتتارى ءۇشىن پايدالانۋ ارەكەتتەرىنەن ساقتاندى.
