بەلگىلى اكتەر بەكجان تۇرىس دوسى اسقار نايمانتاەۆتى ەسكە الىپ، ەستەلىك جازبا جاريالادى، دەپ حابارلايدى "ادىرنا" ءتىلشىسى.
تەاتر جانە كينو اكتەرى بەكجان تۇرىس الەۋمەتتىك جەلىدەگى پاراقشاسىندا ونەردەگى سەرىگى ءارى ومىردەگى دوسى، مارقۇم اسقار نايمانتاەۆقا ارناپ جازبا جاريالادى.
زىمىراعان ۋاقىت-اي... تۋعان دالاسى مەن تۋىرلىعى بيىك تاۋلارىنا تىنىمسىز شاپقىلاپ، پەرزەنتتىك بولمىسىمەن ءوزى قايتا جاڭعىرتقان "حالىق تەاترى" دەيتىن اسا كۇردەلى، قاناتتى، قۋاتتى ونەردىڭ ءورىسىن كوركەيتىپ، قازاق دەيتىن تۋعان حالقىنا بويىندا بارىن ونەرى ارقىلى سارقا ۇسىنعان اسقار باۋىرىمنىڭ دا قىرقى كەپ قاپتى، - دەپ جازدى بەكجان تۇرىس اكتەردىڭ قايتىس بولعانىن ەسكە الىپ.
اكتەر اسقار نايمانتاەۆ سىن ساعاتتارى سوعىلعانشا ونەر ساحناسىندا ايانباي ەڭبەك ەتكەن.
حالقىنىڭ ساحنا مادەنيەتىنىڭ جوعىن جوقتاپ، كەم-كەتىگىن تۇگەندەپ، ونەر دەگەن قاسيەتتى مەكەنگە قارشادايىنان كىرىپ، ميۋالى باعىنىڭ جەمىسىن جەپ ەرجەتكەن اسەكەڭ قازاق ونەرىنە قال-قادىرىنشە ۇلەس قوستى. ونەر ءۇشىن ءومىر ءسۇرۋدىڭ نە ەكەنىن دالەلدەدى. ەشقاشان ماسەلەسى بىتپەگەن قازاق مادەنيەتىنىڭ جىرتىعىن جاماسام، ورتايعانىن تولتىرسام دەپ جانتالاستى. جۇدىرىقتاي جۇرەگىن ونەر ءۇشىن اياماي اۋىرتتى. ەڭبەگىمدى بىرەۋ كورسىن، باعالاسىن دەگەن جوق، ءوزىمنىڭ ازاماتتىق پارىزىم دەپ ۇقتى، - دەدى ءوز جازباسىندا بەكجان تۇرىس.
مارقۇم اسقار نايمانتاەۆ تۋرالى سىر شەرتكەن اكتەر:
ۇستازدىعى، رەجيسسەرلىگى، جازارماندىعى، اكتەرلىگى — وسىنىڭ بارىنە قابىلەتى بىردەي ەدى. ەشكىمگە جالتاقتاپ- جالباڭداماي، سىرتقا مومىن عۇمىر كەشىپ، ءومىرىنىڭ بايانىن ونەرمەن ءوردى. ول ەل-جۇرتىنىڭ ءداستۇرىن، سالت-ساناسىن، ادەپ- ىرىمىن، ۇلتىنىڭ ەستەتيكالىق تالعامىن، ۇلتتىق مادەنيەتىن جەكە باسىنىڭ كۇيكى تىرلىگىنەن جوعارى قويدى. جاراتىلىسىنان بىتكەن سابىر مەن سالماعىن ساقتاي وتىرىپ، كەز كەلگەن قوعامدىق ورتادا ءوزىنىڭ ويىن بۇكپەسىز ايتىپ، ءازىل مەن قالجىڭنىڭ ىلگەك تۇيمەلەرىن اعىتىپ وتىراتىن. تىرلىك قانجىعاسىندا ءجۇرىپ ايتقان كوپ ءسوزى كوزى تىرىسىندە اڭىزعا اينالدى. ەل مۇددەسىن ەكى ەلى ەستەن شىعارعان جوق. ءبارى ادامنىڭ ويلاعانىنداي بولا بەرمەيدى عوي، ارمانى كوپ ەدى... امال قانشا... جالعان دۇنيەدەگى ساعىم بەينەسى ەندى تەك ەسكە الۋمەن عانا جۇبانىش بولىپ وتىر. شاراسىزدىقتان تارىققان كوڭىلىڭە كەڭشىلىك كورسەتە الماعان كەزدەرىمىز بولسا، كەشىر، اسەكە...، - دەپ كەشىرىم سۇرادى بەكجان تۇرىس ءوز الەۋمەتتىك جەلىدەگى ەسكە الۋ جازباسىندا.
