Belgılı akter Bekjan Tūrys dosy Asqar Naimantaevty eske alyp, estelık jazba jariialady, dep habarlaidy "Adyrna" tılşısı.
Teatr jäne kino akterı Bekjan Tūrys äleumettık jelıdegı paraqşasynda önerdegı serıgı ärı ömırdegı dosy, marqūm Asqar Naimantaevqa arnap jazba jariialady.
Zymyraǧan uaqyt-ai... Tuǧan dalasy men tuyrlyǧy biık taularyna tynymsyz şapqylap, perzenttık bolmysymen özı qaita jaŋǧyrtqan "Halyq teatry" deitın asa kürdelı, qanatty, quatty önerdıŋ örısın körkeitıp, Qazaq deitın tuǧan halqyna boiynda baryn önerı arqyly sarqa ūsynǧan Asqar bauyrymnyŋ da qyrqy kep qapty, - dep jazdy Bekjan Tūrys akterdıŋ qaitys bolǧanyn eske alyp.Akter Asqar Naimantaev syn saǧattary soǧylǧanşa öner sahnasynda aianbai eŋbek etken.
Halqynyŋ sahna mädenietınıŋ joǧyn joqtap, kem-ketıgın tügendep, öner degen qasiettı mekenge qarşadaiynan kırıp, miualy baǧynyŋ jemısın jep erjetken Asekeŋ qazaq önerıne qal-qadırınşe üles qosty. Öner üşın ömır sürudıŋ ne ekenın däleldedı. Eşqaşan mäselesı bıtpegen qazaq mädenietınıŋ jyrtyǧyn jamasam, ortaiǧanyn toltyrsam dep jantalasty. Jūdyryqtai jüregın öner üşın aiamai auyrtty. Eŋbegımdı bıreu körsın, baǧalasyn degen joq, özımnıŋ azamattyq paryzym dep ūqty, - dedı öz jazbasynda Bekjan Tūrys.Marqūm Asqar Naimantaev turaly syr şertken akter:
Ūstazdyǧy, rejisserlıgı, jazarmandyǧy, akterlıgı — osynyŋ bärıne qabıletı bırdei edı. Eşkımge jaltaqtap- jalbaŋdamai, syrtqa momyn ǧūmyr keşıp, ömırınıŋ baianyn önermen ördı. Ol el-jūrtynyŋ dästürın, salt-sanasyn, ädep- yrymyn, ūltynyŋ estetikalyq talǧamyn, ūlttyq mädenietın jeke basynyŋ küikı tırlıgınen joǧary qoidy. Jaratylysynan bıtken sabyr men salmaǧyn saqtai otyryp, kez kelgen qoǧamdyq ortada özınıŋ oiyn bükpesız aityp, äzıl men qaljyŋnyŋ ılgek tüimelerın aǧytyp otyratyn. Tırlık qanjyǧasynda jürıp aitqan köp sözı közı tırısınde aŋyzǧa ainaldy. El müddesın ekı elı esten şyǧarǧan joq. Bärı adamnyŋ oilaǧanyndai bola bermeidı ǧoi, armany köp edı... Amal qanşa... Jalǧan düniedegı saǧym beinesı endı tek eske alumen ǧana jūbanyş bolyp otyr. Şarasyzdyqtan taryqqan köŋılıŋe keŋşılık körsete almaǧan kezderımız bolsa, keşır, Aseke..., - dep keşırım sūrady Bekjan Tūrys öz äleumettık jelıdegı eske alu jazbasynda.
Ūqsas jaŋalyqtar
