جاقىندا عانا ىسكە قوسىلعان «ۇلتتىق قور — بالالارعا» جوباسىنان شۋ شىقتى، دەپ حابارلايدى "ادىرنا" ءتىلشىسى كتك تەلەارناسىنا سىلتەپ.
«ۇلتتىق قور — بالالارعا» باعدارلاماسىنان شۋ شىقتى.
15 قاڭتار كۇنى قوردان اقشا الاتىنداردىڭ ناقتى ءتىزىمى جاريالانۋى ءتيىس. دەگەنمەن اتا-انالار پەرزەنتى تۋرالى مالىمەتتەردى e-Gov ەلەكتروندى ۇكىمەت پورتالىندا تەكسەرىپ، دۇرىس-بۇرىستىعىنا كوز جەتكىزۋدە. سەبەبى كەيبىر تۇرعىن ءوز بالاسىنىڭ ورنىنا وزگەنىڭ اتى-ءجونىنىڭ تىركەلگەنىن انىقتاعان.
"بالالاردىڭ بولاشاعىن!" دەپ بىلتىردان بەرى سۇيىنشىلەتكەن جوبا اعىمداعى جىلدىڭ 1 قاڭتاردان باستاپ ىسكە قوسىلعان. ال قاڭتاردىڭ ورتاسىندا جوبا قاراجاتىنا دامەلى 7 ميلليون بالانىڭ ناقتى ءتىزىمى جاريالانۋى ءتيىس.
ءتىزىم جاريالانعاننان سوڭ اقپان ايىنان باستاپ كامەلەتكە تولماعان بالالاردىڭ شوتىنا قوردىڭ ينۆەستيتسيا تابىسىنىڭ 50% ءتۇسىپ وتىرادى.
ال جاۋاپتىلار 18-گە تولماعان بالانىڭ دەرەكتەرىن eGov-تاعى بازاعا ەنگىزىپ، تەكسەرىپ قويۋ تۋرالى ايتتى. تەكسەرىستەن كەيىن ءبىراز قازاقستاندىق ءوز بالاسىنىڭ ورنىنا وزگە بىرەۋدىڭ تىركەلگەنىن كورىپ تاڭ قالۋدا. اسىرەسە ازاماتتاردىڭ جەكە سايكەستەندىرۋ ءنومىرى وڭدى-سولدى ينتەرنەتتى كەزىپ جۇرگەنى تاعى بار.
«تۇسەتىن اقشا ءبارىبىر تۇسسە، eGov-تى اڭدىپ نەمىز بار» دەگەن ساۋالعا ماماندار دا جاۋاپ بەرۋدە. ايتۋىنشا، بالانىڭ جەكە سايكەستىندىرۋ ءنومىرىن «بالانى قوسۋ» باتىرماسىن باسىپ پلاتفورماعا ەنگىزۋ ارقىلى شوتقا تۇسكەن اقشانى باقىلاۋعا بولادى ەكەن.
الدىن الا ەسەپتەۋلەر بويىنشا، 2024 جىلى تۋعان نارەستەنىڭ شوتىنا 18 جىلدا 3 جارىم مىڭ اقش دوللارى جينالادى. بالا كامەلەتكە تولعاننان كەيىن دە شوتتاعى قاراجات 10 جىل بويى ساقتالادى. ەگەر بىرنەشە جىل بويى ازامات قاراجاتتى پايدانالباسا كولەمدى قارجى زەينەتاقى شوتىنا اۋدارىلادى. بالالار مەملەكەتتەن بولىنگەن قاراجاتتى ءبىلىم الۋعا، تۇرعىن ءۇي جاعدايىن جاقسارتۋعا پايدالانا الادى.
