ماسكەۋدەگى قازاق قاۋىمداستىعىنىڭ باسشىسى پولات جامالوۆقا قارسى رەسەي ارمياسى تۋرالى جالعان مالىمەتتەردى تاراتۋ بابى بويىنشا قىلمىستىق ءىس قوزعالدى، دەپ حابارلايدى "ادىرنا" ۇلتتىق پورتالى.
«ۆەرستكا» باسىلىمى بۇل ءىستى وتكەن جىلدىڭ قىركۇيەگىندە ماسكەۋدىڭ سولتۇستىك-شىعىس وكرۋگىنىڭ اسا ماڭىزدى ىستەرىن تەرگەۋ ءبولىمى باستاعانىن حابارلايدى. بۇل وقيعاعا جامالوۆتىڭ Facebook-تەگى جازباسى سەبەپ بولعان. جازبادا 2022 جىلدىڭ تامىز ايىنىڭ ورتاسىنا قاراي ۋكراينادا 49 مىڭعا جۋىق رەسەيلىك اسكەري ادام قازا تاپقانى جانە ماسكەۋ سوعىستاعى شىعىنداردى اشىپ كورسەتپەيتىنى تۋرالى ايتىلعان.
سونداي-اق باق 2022 جىلدىڭ قاڭتارىندا قازاقستاندا جاپپاي نارازىلىقتار مەن تارتىپسىزدىكتەر كەزىندە جامالوۆتىڭ رەسەي اسكەرىنىڭ ەلگە كىرۋىن وككۋپاتسيا دەپ اتاعانىن دا اتاپ وتەدى.
اتالعان باپ بويىنشا، جامالوۆ 15 جىلعا باس بوستاندىعىنان ايىرىلۋى مۇمكىن. رەسەي سوتتارى ۋكرايناعا باسىپ كىرۋ تۋرالى كەز كەلگەن سىندى جانە كرەملدىڭ رەسمي ۇستانىمىنا سايكەس كەلمەيتىن سوعىس تۋرالى اقپاراتتى جالعان دەپ تانيدى.
"ادىرنا" ۇلتتىق پورتالى
