وتارداعى اسكەري بولىمدەردىڭ بىرىندە مەرزىمدى اسكەري قىزمەتشىنىڭ جاق سۇيەگى سىنعان. كۇش قولدانۋ دەرەگى بويىنشا قىلمىستىق ءىس قوزعالدى. زارداپ شەككەن سارباز الماتىداعى اسكەري-كلينيكالىق گوسپيتالدا ەم قابىلداپ جاتىر، دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەپ.
بۇعان دەيىن الەۋمەتتىك جەلىلەردە زارداپ شەككەن اسكەري قىزمەتشىنىڭ اپكەسى ۆيدەو جاريالادى. ايەلدىڭ ايتۋىنشا، ونىڭ ءىنىسى 2025 جىلعى 28 مامىردا وتارعا مەرزىمدى اسكەري قىزمەتكە شاقىرىلعان.
"قىزمەتىنىڭ اياقتالۋىنا 4 اي قالعاندا ءۇش سەرجانت ونى ۇرىپ-سوعىپ، ءبىر سەرجانت تەمىر زاتپەن ۇرىپ، جاق سۇيەگى مەن مۇرنىن سىندىرعان. ول اۋىر جاراقات الدى", - دەلىنگەن ۆيدەودا.
ونىڭ ايتۋىنشا، وقيعادان كەيىن ەكى اپتا بويى اسكەري قىزمەتشىگە قىسىم كورسەتىلگەن. ودان سوڭ وعان ازاماتتىق كيىم كيگىزىپ، الماتى قالاسىنداعى №5 قالالىق اۋرۋحاناعا جەتكىزگەن. اپكەسىنىڭ سوزىنشە، جول اقىسىن سارباز قالتاسىنان شىعارعان.
"وتا 300 مىڭ تەڭگەگە جاسالدى، ەكى وتا جاسالىپ، اۋىز قۋىسىنا مەتالل كونسترۋكتسيالار ورناتىلدى. بىراق ونى دارىگەرلەردىڭ باقىلاۋىندا قالدىرماي، اۋرۋحاناعا جاتقىزباعان. كەرىسىنشە، سانيتارلىق تا، مەديتسينالىق تا كومەگى جوق جاعدايدا 16 كۇن "ۇيقاماققا" جىبەرگەن", - دەپ مالىمدەدى اپكەسى.
سونداي-اق، ول 29 قاڭتاردا تۋىستارى اسكەري بولىمنەن ساربازدى تابا الماعانىن ايتتى. ونىڭ ايتۋىنشا، روتا كومانديرى كەيىن تۋىستارىن ءىنىسى بولعان پاتەرگە اپارعان. بۇدان كەيىن سارباز مەدپۋنكتكە ورنالاستىرىلىپ، تەكسەرىس وتانىڭ دۇرىس جاسالماعانىن انىقتاعان. سودان سوڭ ونى الماتىداعى №1 اسكەري گوسپيتالعا جىبەرگەن، قازىر ول سول جەردە ەم قابىلداپ جاتىر.
ء"بىز باۋىرىمىزدىڭ دەنساۋلىعىن قالپىنا كەلتىرۋدى، جاق سۇيەگىن ورنىنا كەلتىرۋدى جانە اسكەرگە كەتكەندەگى قالپىنداي ساۋ كۇيىندە قايتارۋدى سۇرايمىز. العاشىندا اسكەري قىزمەتشىلەر كىناسىن مويىندامادى، قازىر كەشىرىم سۇراپ وتىر. ءبىز ولاردى كەشىرمەيمىز", - دەلىنگەن ۇندەۋدە.
ءوتىنىش يەسىنىڭ ايتۋىنشا، بۇعان دەيىن بۇل دەرەك بويىنشا ءىس قوزعالعان، بىراق كەيىن جابىلىپ قالعان.
"وسىعان بايلانىستى اكەمىز اۋرۋحانادا اۋىر حالدە جاتىر، سوعان قاراماستان اسكەري قىزمەتشىلەر ودان تاتۋلاسۋ تۋرالى قاعازعا قول قويۋدى تالاپ ەتىپ جاتىر", - دەيدى اپكەسى.
وتباسى كىنالىلەردىڭ ارەكەتىنە قۇقىقتىق باعا بەرىلىپ، قىلمىستىق ءىس قوزعالسىن دەپ سۇرايدى.
باس اسكەري پوليتسيانىڭ مالىمەتىنشە، گۆارديالىق گارنيزوننىڭ اسكەري پوليتسياسى اسكەري قىزمەتشىگە كۇش قولدانۋ دەرەك بويىنشا قىلمىستىق ءىس قوزعاعان.
"وقيعا سالدارىنان اسكەري قىزمەتشىلەردىڭ ءبىرىنىڭ جاق سۇيەگى سىنعان. زارداپ شەگۋشى گوسپيتالعا جاتقىزىلىپ، الماتى قالاسىنداعى اسكەري-كلينيكالىق گوسپيتالدا ەم قابىلداپ جاتىر. وعان قاجەتتى بىلىكتى مەديتسينالىق كومەك تولىق كورسەتىلىپ جاتىر، دەنساۋلىق جاعدايى اسكەري دارىگەرلەردىڭ تۇراقتى باقىلاۋىندا", - دەلىنگەن حابارلامادا.
ماتەريالدار سوتالدى تەرگەپ-تەكسەرۋدىڭ بىرىڭعاي تىزىلىمىنە تىركەلگەن. تەكسەرۋ جۇرگىزىلىپ جاتىر. تەرگەۋ بارىسىندا وقيعاعا قاتىسى بار بارلىق تۇلعانىڭ، سونداي-اق، بولىمدەگى الىمجەتتىك دەرەگى تۋرالى جوعارى باسشىلىققا ۋاقتىلى بايانداما جاساماعان جانە مەديتسينالىق كومەكتى ۇيىمداستىرماعان اسكەري ءبولىم لاۋازىمدى تۇلعالارىنىڭ ارەكەتىنە قۇقىقتىق باعا بەرىلەدى.
تەرگەۋ شارالارى كەزەڭىندە اسكەري ءبولىمنىڭ بىرقاتار لاۋازىمدى ادام قىزمەتتىك مىندەتتەرىن اتقارۋدان شەتتەتىلدى.
باس اسكەري پوليتسيا تەرگەۋ قورىتىندىسى بويىنشا كىنالىلەر قازاقستان زاڭناماسىنا سايكەس جاۋاپكەرشىلىككە تارتىلاتىنىن اتاپ ءوتتى.
