جاڭا جىلدان باستاپ زياندى ەڭبەك جاعدايىندا ىستەيتىن ازاماتتارعا ارناۋلى الەۋمەتتىك تولەم تاعايىندالدى. بۇل تۋرالى ەڭبەك مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
مالىمەت بويىنشا، تولەمنىڭ ورتاشا سوماسى 200 مىڭ تەڭگەدەن اسادى.
ارناۋلى الەۋمەتتىك تولەم 55 جاسقا تولعان جانە كەمىندە 84 اي مىندەتتى كاسىپتىك زەينەتاقى جارنالارى تولەنگەن، سونداي-اق زياندى جۇمىستاعى قىزمەتىن توقتاتقان جۇمىسشىلارعا بەرىلەدى.
بيىل زياندى وندىرىستەردە ىستەيتىن 37 مىڭ قازاقستاندىق ارنايى تولەم الا الادى. ونىڭ ورتاشا مولشەرى 208 مىڭ تەڭگەنى قۇرايدى.
تولەم زەينەت جاسىنا دەيىن، ياعني 63 جاسقا دەيىن تولەنەدى.
ارناۋلى تولەم الاتىن جۇمىسشىلار اۋىر جۇمىستان جەڭىل جۇمىسقا اۋىسۋى شارت نەمەسە ءوز قالاۋىمەن جۇمىستان مۇلدە شىعا الادى.
ارنايى الەۋمەتتىك تولەم بىرنەشە جەردەن تولەنەدى. ولار:
- بيۋدجەتتەن 2 ەڭ تومەنگى كۇنكورىس دەڭگەيى مولشەرىندە ارناۋلى كاسىپتىك مەملەكەتتىك جاردەماقى;
- جۇمىس بەرۋشىنىڭ قاراجاتى ەسەبىنەن 1 ەڭ تومەنگى كۇنكورىس دەڭگەيى مولشەرىندە كاسىبي تولەم;
- ساقتاندىرۋ ۇيىمدارىنان زەينەتاقى الدىنداعى اننۋيتەت شارتى بويىنشا 1 ەڭ تومەنگى كۇنكورىس دەڭگەيى مولشەرىندە ساقتاندىرۋ تولەمى;
- بىرىڭعاي جيناقتاۋشى زەينەتاقى قورىنان مىندەتتى كاسىپتىك زەينەتاقى جارنالارى ەسەبىنەن قالىپتاستىرىلعان زەينەتاقى.
2023 جىلى 1 قىركۇيەكتە پرەزيدەنت قاسىم-جومارت توقاەۆ اۋىر جانە زياندى وندىرىستە جۇمىس ىستەيتىن ازاماتتارعا ارنايى الەۋمەتتىك تولەم تولەۋدى تاپسىردى.
ايتا كەتەيىك، اۋىر جانە زياندى وندىرىستە ىستەيتىن جۇمىسشىلار قاتارىنا شاحتەرلەر، مەتاللۋرگتەر، كەنشىلەر جانە تاعى باسقالارى كىرەدى.
